महाराष्ट्रात पुन्हा पावसाची बॅटिंग! विदर्भ, मराठवाडा आणि कोकणात जोरदार सरी; पुढील ३ दिवसांचा हवामान अंदाज

पुणे : नैर्ऋत्य मान्सूनचा राजस्थानच्या पश्चिम भागातून परतीचा प्रवास अखेर सुरू झाला आहे. दरवर्षी साधारणपणे १७ सप्टेंबरपासून मान्सूनच्या माघारीला सुरुवात होते. मात्र, यंदा दोन दिवस उशिराने मान्सूनने परतीचा प्रवास सुरू केला आहे.

विशेष म्हणजे, मान्सूनच्या माघारीच्या काळातच बंगालच्या उपसागरात नव्या हवामान प्रणालीची निर्मिती झाली आहे. त्यामुळे महाराष्ट्रासह देशातील अनेक भागांत पुन्हा एकदा पावसासाठी अनुकूल वातावरण तयार झाले आहे.

बंगालच्या उपसागरात कमी दाबाचे क्षेत्र

भारतीय हवामान विभागाच्या माहितीनुसार, बंगालच्या उपसागरात सध्या कमी दाबाचे क्षेत्र तयार झाले आहे. २१ सप्टेंबरपर्यंत या प्रणालीचे रूपांतर अवदाबात, तर २२ सप्टेंबरपर्यंत तीव्र अवदाबात होण्याचा अंदाज आहे.

२३ सप्टेंबरच्या सकाळपर्यंत ही प्रणाली दक्षिण ओडिशा आणि उत्तर आंध्र प्रदेशच्या किनारपट्टीजवळ पोहोचण्याची शक्यता आहे. या हवामान प्रणालीचा परिणाम महाराष्ट्राच्या हवामानावरही होत असून राज्यात पुन्हा पावसाची सक्रियता वाढली आहे.

महाराष्ट्रात पुढील तीन दिवसांचा पावसाचा अंदाज

२१ सप्टेंबर : अनेक जिल्ह्यांत पावसाची शक्यता

२१ सप्टेंबर रोजी विदर्भ, मध्य महाराष्ट्र, उत्तर महाराष्ट्र आणि दक्षिण महाराष्ट्रातील अनेक जिल्ह्यांमध्ये विजांच्या कडकडाटासह मध्यम ते मुसळधार पावसाची शक्यता आहे.

येलो अलर्ट असलेले जिल्हे : गडचिरोली, गोंदिया, चंद्रपूर, भंडारा, नागपूर, वर्धा, यवतमाळ, अमरावती, हिंगोली, परभणी, नांदेड, नाशिकचा घाट परिसर, अहिल्यानगर, पुण्याचा घाट परिसर, सातारा, सांगली, कोल्हापूर, रत्नागिरी, सिंधुदुर्ग, सोलापूर, धाराशिव आणि लातूर.

इतर जिल्हे : ठाणे, रायगड, जळगाव, छत्रपती संभाजीनगर आणि बीड येथे हलक्या ते मध्यम स्वरूपाच्या पावसाच्या सरी पडण्याची शक्यता आहे.

२२ सप्टेंबर : पावसाचा जोर वाढणार

२२ सप्टेंबर रोजी राज्यातील पावसाचा जोर आणखी वाढण्याचा अंदाज आहे.

येलो अलर्ट : विदर्भातील सर्व जिल्हे, तसेच नांदेड, परभणी, बीड, लातूर, धाराशिव, सोलापूर, पुणे, सातारा, सांगली, कोल्हापूरचा घाट परिसर आणि कोकणातील रायगड, रत्नागिरी व सिंधुदुर्ग या जिल्ह्यांना येलो अलर्ट देण्यात आला आहे.

इतर जिल्हे : नाशिक, पालघर, मुंबई, ठाणे, अहिल्यानगर, छत्रपती संभाजीनगर आणि जालना येथे ढगाळ वातावरण राहण्याची शक्यता असून तुरळक पावसाच्या सरी पडू शकतात.

२३ सप्टेंबर : पावसाचा जोर काहीसा कमी होणार

२३ सप्टेंबर रोजी राज्यातील पावसाचा जोर काहीसा ओसरण्याची शक्यता आहे. मात्र, दक्षिण महाराष्ट्रातील काही भागांत पावसाची शक्यता कायम राहणार आहे. उर्वरित महाराष्ट्रात हवामान प्रामुख्याने कोरडे किंवा ढगाळ राहण्याचा अंदाज आहे.

कमी दाबाचे क्षेत्र, अवदाब आणि तीव्र अवदाब म्हणजे काय?

कमी दाबाचे क्षेत्र (Low Pressure Area) : हवामान प्रणालीच्या तीव्रतेतील हा सुरुवातीचा टप्पा आहे. यामध्ये वाऱ्याचा वेग तुलनेने कमी असतो आणि ढगाळ वातावरणासह हलका ते मध्यम पाऊस पडू शकतो.

अवदाब (Depression) : कमी दाबाचे क्षेत्र अधिक तीव्र झाल्यानंतर त्याचे रूपांतर अवदाबात होते. या अवस्थेत वाऱ्याचा वेग वाढतो आणि काही भागांत जोरदार वाऱ्यासह मुसळधार पाऊस पडू शकतो.

तीव्र अवदाब (Deep Depression) : हा अवदाबापेक्षा अधिक तीव्र टप्पा आहे. या प्रणालीमुळे जोरदार वारे, मुसळधार ते अतिमुसळधार पाऊस आणि समुद्रात उंच लाटा निर्माण होऊ शकतात. प्रणालीची तीव्रता आणखी वाढल्यास तिचे चक्रीवादळात रूपांतर होऊ शकते.