पुणेकरांनो, दिवाळीला गावी जाताना सावधान! ‘वे टू भुर्र…’ स्टेटस टाकताय? चोरट्यांची असू शकते नजर
पुणे : दिवाळीच्या सणाला सुरुवात झाली असून नोकरी किंवा कामानिमित्त पुण्यात राहणारे अनेकजण सण साजरा करण्यासाठी आपल्या मूळ गावी रवाना होत आहेत. मात्र, गावी जाताना सोशल मीडियावर प्रवासाचे फोटो, व्हिडिओ किंवा स्टेटस शेअर करण्याची सवय तुम्हाला महागात पडू शकते. कारण तुमच्या एका पोस्टमुळे घर बंद असल्याची माहिती चोरट्यांपर्यंत पोहोचण्याची शक्यता आहे.
सणासुदीच्या काळात घरफोडीच्या घटनांचा धोका वाढतो. अनेक कुटुंबे घराला कुलूप लावून बाहेरगावी जातात. अशा वेळी बंद घरांची माहिती मिळाल्यास चोरटे संधी साधू शकतात. त्यामुळे घराची सुरक्षा जपण्यासाठी केवळ दरवाजे आणि खिडक्यांना कुलूप लावणे पुरेसे नाही, तर सोशल मीडियावर कोणती माहिती शेअर करतो, याकडेही लक्ष देणे आवश्यक आहे.
सोशल मीडियावर प्रवासाचे फोटो टाकताना काळजी घ्या!
फेसबुक, इंस्टाग्राम आणि व्हॉट्सॲपवर प्रवासाचे फोटो, व्हिडिओ आणि स्टेटस शेअर करण्याची अनेकांना सवय असते. मात्र, प्रत्येक गोष्ट सोशल मीडियावर सार्वजनिक करणे आवश्यक नाही. तुमच्या पोस्टमधून घरातील सर्व सदस्य बाहेरगावी असल्याची माहिती अनोळखी व्यक्तींनाही मिळू शकते.
विशेषतः सोशल मीडिया अकाउंट सार्वजनिक असल्यास तुमचे फोटो आणि अपडेट्स अनोळखी लोकांनाही पाहता येतात. त्यामुळे प्रवासाला निघाल्याची माहिती सार्वजनिकपणे देणे टाळा. तसेच घराचा पत्ता, परिसराची ओळख किंवा घराच्या सुरक्षेशी संबंधित माहिती उघड होईल, असे फोटो पोस्ट करू नका. प्रवासाचे फोटो गावी जाण्याऐवजी परतल्यानंतर शेअर करणे अधिक सुरक्षित ठरू शकते.
‘वे टू भुर्र’ स्टेटस टाकण्यापूर्वी विचार करा!
‘वे टू भुर्र’, ‘गोवा डायरीज’, ‘मुंबई कॉलिंग’ अशा प्रकारचे स्टेटस अनेकजण प्रवासाला निघताना शेअर करतात. मात्र, अशा पोस्टमधून तुम्ही कुठे जात आहात, किती दिवस बाहेर राहणार आहात आणि घरात कोणी आहे की नाही, याचा अंदाज इतरांना येऊ शकतो.
त्यामुळे प्रवासाचे ठिकाण, बाहेरगावी जाण्याचा कालावधी आणि घर रिकामे असल्याचे संकेत देणाऱ्या पोस्ट टाकणे टाळा. दिवाळीचा आनंद साजरा करताना आपल्या घराच्या सुरक्षिततेकडेही लक्ष द्या. सोशल मीडियावरील एक छोटीशी खबरदारी संभाव्य घरफोडीचा धोका कमी करण्यास मदत करू शकते.
