जिओ ग्राहकांसाठी दिवाळीची भन्नाट भेट! अवघ्या १५ रुपयांत मिळणार १ जीबी डेटा; ५जीचा फायदाही, जाणून घ्या प्लॅनची संपूर्ण माहिती

मुंबई : दिवाळीच्या खरेदीसोबतच मोबाईल रिचार्जचा खर्च कमी करण्याची संधी रिलायन्स जिओच्या ग्राहकांना मिळणार आहे. कंपनीने अवघ्या १५ रुपयांचा नवा डेटा अॅड-ऑन प्लॅन उपलब्ध केला आहे. ५ नोव्हेंबरपासून ग्राहकांना या पॅकचे रिचार्ज करता येणार आहे. विशेष म्हणजे, नियमित रिचार्जमधील इंटरनेट संपल्यानंतर अतिरिक्त डेटा हवा असल्यास हा स्वस्त पर्याय उपयोगी ठरू शकतो. या पॅकमध्ये १ जीबी डेटासह काही ग्राहकांना अमर्यादित ५जी डेटाचाही लाभ मिळणार आहे.

१५ रुपयांच्या रिचार्जमध्ये नेमकं काय मिळणार?

जिओच्या नव्या डेटा पॅकची वैधता २४ तासांची आहे. या कालावधीत ग्राहकांना एकूण १ जीबी हायस्पीड डेटा वापरता येणार आहे. नियमित प्लॅनमधील डेटा संपल्यास पुन्हा महागडा रिचार्ज करण्याऐवजी हा अॅड-ऑन पॅक घेता येईल. चित्रफिती पाहणे, ऑनलाइन खेळ खेळणे, मोठ्या फाइल्स उतरवणे आणि इंटरनेटवरील इतर कामांसाठी हा डेटा वापरता येणार आहे.

या पॅकच्या माध्यमातून मोबाईल हॉटस्पॉट सुरू करून लॅपटॉप किंवा टॅबलेटसारख्या अन्य उपकरणांवरही इंटरनेट वापरण्याची सुविधा मिळू शकते. याशिवाय कंपनीकडून २०० एमबी अतिरिक्त मोफत ४जी डेटा दिला जात असल्याचे वृत्तात नमूद करण्यात आले आहे.

अमर्यादित ५जी डेटा कोणाला मिळणार?

या १५ रुपयांच्या पॅकमध्ये अमर्यादित ५जी डेटाचाही लाभ असल्याचे सांगितले जात आहे. मात्र, हा फायदा सर्व ग्राहकांना मिळणार नाही. ज्या ग्राहकांकडे ५जी सुविधा असलेला स्मार्टफोन आहे आणि जे जिओचे ५जी नेटवर्क वापरतात, त्यांनाच या सुविधेचा लाभ मिळू शकतो. त्यामुळे रिचार्ज करण्यापूर्वी आपल्या क्रमांकावर आणि परिसरात ही सुविधा उपलब्ध आहे का, हे तपासणे महत्त्वाचे ठरेल.

याआधीही जिओने आणले स्वस्त रिचार्ज पर्याय

यापूर्वी दूरसंचार नियामकाच्या शिफारशींनुसार जिओने १४७, १७७, १९६ आणि १९७ रुपयांचे स्वस्त रिचार्ज पर्याय उपलब्ध केले होते. या योजनांमध्ये अनुक्रमे २२ दिवस, २८ दिवस, ३० दिवस आणि एका कॅलेंडर महिन्याची वैधता दिली जाते. या चारही योजनांमध्ये अमर्यादित व्हॉइस कॉलिंग आणि ३०० मोफत संदेशांची सुविधा आहे. मात्र, त्यामध्ये इंटरनेट डेटा मिळत नाही.

त्यामुळे या योजनांचा वापर करणाऱ्या ग्राहकांना इंटरनेटची गरज भासल्यास स्वतंत्र डेटा पॅक घ्यावा लागतो. अशा ग्राहकांसाठी १५ रुपयांचा नवा पर्याय उपयुक्त ठरू शकतो. कमी किमतीत अतिरिक्त इंटरनेट मिळत असल्याने जिओच्या या नव्या रिचार्जकडे ग्राहकांचे लक्ष लागले आहे.