Pune : गणपतीचे विसर्जन करायला गेलेले बाप-लेक बुडाले, मावळमध्ये दुःखद घटना, कुटुंबियांवर दुःखाचा डोंगर…

Pune : गणेशोत्सवाच्या दरम्यान पुणे जिल्ह्यात दुर्दैवी घटना समोर आली आहे. घरगुती गणपती मूर्तीचे विसर्जन करताना बाप लेक बुडाल्याची दुर्दैवी घटना पवन मावळातील कडधे या गावात घडली आहे. वडिलांचा मृतदेह सापडला असून मुलाच्या मृतदेहाचा पाण्यात शोध घेण्याचं काम सुरू आहे.

संजय धोंडू शिर्के या दुर्दैवी घटनेत मृत्युमुखी पडलेल्या वडिलांचं नाव आहे. तर हर्षल संजय शिर्के या मुलाचा मृतदेह पाण्यात शोधण्याचं काम सुरू आहे.

सविस्तर माहिती अशी की, कडधे गावात हे बाप, लेक घरगुती गणपती मूर्तीचे विसर्जन करण्यासाठी घराच्या जवळ असलेल्या माळावर उत्खनन केलेल्या जागेत साचलेल्या पाण्याच्या डबक्यात गेले होते. Pune

मुलगा हर्षल शिर्के बुडत असताना त्याला वाचवण्यासाठी बापाने पाण्यात उडी घेतली, पण दोघेही पाण्यात बुडाले. घटनास्थळी वन्यजीव रक्षक मावळ टीम, कामशेत पोलिस आणि लोणावळ्यातील शिवदुर्ग रेस्कू टीमने धाव घेतली. रेस्कू टीमच्या शोध मोहिमेत वडिल संजय शिर्के यांचा मृतदेह सापडला असून मुलाचा पाण्यात शोध सुरू आहे. या घटनेने परिसरात हळहळ व्यक्त होत आहे.