८४२ मतदान केंद्रांवर उद्या फैसला! ४१ उमेदवार रिंगणात, छत्रपती संभाजीनगर विभागात निवडणुकीची तयारी पूर्ण

छत्रपती संभाजीनगर : औरंगाबाद विभाग पदवीधर मतदारसंघाच्या निवडणुकीसाठी प्रशासकीय यंत्रणा सज्ज झाली असून, उद्या शुक्रवार, २३ ऑक्टोबर रोजी विभागातील आठ जिल्ह्यांमध्ये मतदान होणार आहे. मतदानासाठी आवश्यक मतपेट्या, मतपत्रिका आणि अन्य साहित्याचे वितरण पूर्ण करण्यात आले असून, नियुक्त अधिकारी व कर्मचाऱ्यांची पथके आपापल्या मतदान केंद्रांकडे रवाना झाली आहेत. सकाळी ८ ते दुपारी ४ या वेळेत मतदान प्रक्रिया पार पडणार आहे. त्यामुळे ४१ उमेदवारांचे भवितव्य ठरवणाऱ्या या निवडणुकीकडे सर्वांचे लक्ष लागले आहे.

विभागीय आयुक्त तथा निवडणूक निर्णय अधिकारी जी. श्रीकांत यांच्या मार्गदर्शनाखाली संपूर्ण विभागात निवडणुकीची तयारी करण्यात आली आहे. छत्रपती संभाजीनगर, जालना, बीड, लातूर, धाराशिव, परभणी, नांदेड आणि हिंगोली या आठ जिल्ह्यांमध्ये मतदानाची व्यवस्था करण्यात आली आहे. संबंधित जिल्ह्यांचे जिल्हाधिकारी सहायक निवडणूक निर्णय अधिकारी म्हणून जबाबदारी सांभाळत आहेत.

प्रत्येक तालुक्यातील निर्धारित वितरण केंद्रांवरून मतदान पथकांना आवश्यक साहित्य देण्यात आले. त्यानंतर अधिकारी आणि कर्मचारी मतपेट्यांसह संबंधित मतदान केंद्रांकडे रवाना झाले. छत्रपती संभाजीनगर तालुक्यातील मतदान केंद्रांसाठी शासकीय अभियांत्रिकी महाविद्यालयातून साहित्याचे वितरण करण्यात आले. इतर तालुक्यांमध्येही याच पद्धतीने मतदान साहित्याचे वाटप पूर्ण करण्यात आले.

आठ जिल्ह्यांतील ८४२ केंद्रांवर मतदान

या पदवीधर मतदारसंघात जिल्हानिहाय मतदान केंद्रांची संख्या पुढीलप्रमाणे आहे.

* छत्रपती संभाजीनगर – २१७

* जालना – ८९

* बीड – १४०

* लातूर – ८८

* धाराशिव – ७६

* परभणी – ७६

* नांदेड – १२०

* हिंगोली – ३६

अशा प्रकारे संपूर्ण विभागात एकूण ८४२ मतदान केंद्रे उभारण्यात आली आहेत. या निवडणुकीत ४१ उमेदवार आपले नशीब आजमावत असून, एकूण ३ लाख २६ हजार ७०१ मतदारांना मतदानाचा हक्क बजावता येणार आहे.

मतदारांनी पसंतीक्रम नोंदवणे आवश्यक

या निवडणुकीत मतदारांना मतपत्रिकेवर पसंतीक्रम नोंदवून मतदान करावे लागणार आहे. त्यामुळे मतदान करताना मतपत्रिकेवरील पसंतीक्रम योग्य पद्धतीने नोंदवणे महत्त्वाचे ठरणार आहे.

मतदान प्रक्रिया शांततेत, निर्भय आणि पारदर्शक वातावरणात पार पाडण्यासाठी सर्व संबंधित यंत्रणांनी परस्पर समन्वय राखावा, असे निर्देश निवडणूक निर्णय अधिकारी जी. श्रीकांत यांनी दिले आहेत. मतदानाच्या दिवशी कोणतीही अडचण उद्भवल्यास संबंधित अधिकाऱ्यांनी तातडीने उपाययोजना कराव्यात, तसेच सर्व अधिकारी आणि कर्मचाऱ्यांनी सतर्क राहून आपली जबाबदारी पार पाडावी, असेही त्यांनी स्पष्ट केले आहे.

आता उद्या सकाळी सुरू होणाऱ्या मतदानातून पदवीधर मतदार कोणाच्या बाजूने कौल देतात आणि ४१ उमेदवारांपैकी कोणाला आघाडी मिळते, याकडे राजकीय वर्तुळासह संपूर्ण विभागाचे लक्ष लागले आहे.