गणेशजन्मानिमित्त श्रीमंत’ दगडूशेठ ‘ला स्वराभिषेक अन गणेश जागर; भाविकांची पहाटेपासून अलोट गर्दी..
पुणे: गणपतीच्या जन्मानिमित्त गणेश चतुर्थी ही मोठ्या भक्तिमय वातावरणात साजरी केली जाते. पुण्याचे ग्रामदैवत आणि कोट्यवधी भाविकांचे श्रद्धास्थान असलेल्या श्रीमंत दगडूशेठ हलवाई गणपती मंदिरामध्ये बाप्पाच्या दर्शनासाठी सकाळपासून भाविकांची अलोट गर्दी आहे.
श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळ च्यावतीने यंदाचा गणेश जन्म सोहळा माघ शुद्ध चतुर्थी म्हणजेच आज बुधवार पेठेतील दगडूशेठ गणपती मंदिरात आयोजित करण्यात आला आहे. आज सकाळपासून भाविकांची दर्शनासाठी रांग लागली असून भक्ती आणि श्रद्धेच्या या वातावरणात संपूर्ण शहर गणपती बाप्पा मोरयाच्या जयघोषाने दुमदुमल आहे.
विनायक अवतार असलेला हा गणेशजन्म सोहळा यंदा देखील सुवर्णपाळण्यामध्ये दुपारी १२ वाजता होणार आहे. यंदा स्वराभिषेक, गणेशयाग, श्री गणेश जागर, नगरप्रदक्षिणा असे विविध धार्मिक व सांस्कृतिक कार्यक्रम देखील आयोजित करण्यात आले आहेत.
संपूर्ण मंदिराला आकर्षक पुष्पसजावट व विद्युतरोषणाई करण्यात येणार आहे. आज पहाटे ३ वाजता ब्रह्मणस्पती सूक्त अभिषेक झाले याशिवाय गणेशसुक्त अभिषेक देखील मंदिरात सुरु असणार आहे तसेच सकाळी ६ ते १० आणि दुपारी १.३० ते सायंकाळी ५ यावेळेत गणेश याग होणार आहे
मुख्य गणेशजन्म सोहळ्याला दुपारी १२ वाजता सुरुवात होणार आहे. यामध्ये पारंपरिक वेशात महिला सहभागी होणार आहेत. जन्माच्या वेळी पुष्पवृष्टी देखील करण्यात येणार आहे. यावेळी गणेशाची मंगल आरती होईल. नगरप्रदक्षिणा मिरवणूक सायंकाळी ६ वाजता दगडूशेठ गणपती मंदिरापासून निघणार आहे. त्यानंतर रात्री ८ वाजता श्रीगणेशाची मंगलआरती होईल.
रात्री १० ते पहाटे ३ वाजेपर्यंत श्री गणेश जागर आयोजित करण्यात आला आहे. गणेशजन्माच्या दिवशी पहाटे ३ वाजल्यापासून मंदिर भाविकांसाठी खुले राहणार आहे. तरी भाविकांनी विविध कार्यक्रमांत सहभागी होत दर्शनाचा लाभ घ्यावा, असे ट्रस्टतर्फे कळविण्यात आले आहे.
दगडूशेठ गणपती हा मनातील इच्छा पूर्ण करणारा गणपती म्हणून जगप्रसिद्ध आहे. आज या गणेशचा जन्म सोहळ्याला सर्व भाविकांच्या अलोट गर्दीने मंदिर परिसर भरून गेला आहे.
