‘घरी सोडतो’ म्हणत कारमध्ये नेलं अन्… पुण्यात चालत्या कारमध्ये महिलेवर अत्याचार; कोरेगाव पार्क हादरलं
पुणे : पार्टी संपली, रात्रीचा अंधार गडद होत गेला आणि “घरी सोडतो” म्हणणाऱ्या व्यक्तीवर विश्वास ठेवणं एका महिलेच्या आयुष्यातील सर्वात मोठी चूक ठरली. पुण्यातील उच्चभ्रू समजल्या जाणाऱ्या कोरेगाव पार्क परिसरात चालत्या कारमध्ये महिलेवर लैंगिक अत्याचार झाल्याची धक्कादायक घटना समोर आली असून, शहरात संतापाची लाट उसळली आहे. या प्रकरणामुळे पुण्यात महिलांच्या सुरक्षेचा प्रश्न पुन्हा एकदा ऐरणीवर आला आहे.
मिळालेल्या माहितीनुसार, ही घटना मुंढवा-कोरेगाव पार्क रस्त्यावर मध्यरात्रीच्या सुमारास घडली. पीडित महिला एका नामांकित हॉटेलमध्ये आयोजित पार्टीसाठी आली होती. पार्टीदरम्यान तिची एका तरुणाशी ओळख झाली होती. दोघांमध्ये काही वेळ संवादही झाला होता. पार्टी संपल्यानंतर आरोपीने महिलेला “रात्र झाली आहे, मी तुला सुरक्षित घरी सोडतो” असा विश्वास दिला. त्यानंतर महिला त्याच्यासोबत कारमध्ये बसली. मात्र, काही अंतर पुढे गेल्यानंतर आरोपीने कार दुसऱ्या दिशेला वळवली आणि चालत्या कारमध्येच तिच्यावर जबरदस्ती करत लैंगिक अत्याचार केल्याचा आरोप करण्यात आला आहे.
पीडित महिलेने आरोपीच्या तावडीतून स्वतःची सुटका करून घेतल्यानंतर तातडीने कोरेगाव पार्क पोलीस ठाण्यात धाव घेतली. तिच्या तक्रारीवरून पोलिसांनी संबंधित आरोपीविरुद्ध गंभीर कलमांखाली गुन्हा दाखल केला आहे. प्राथमिक तपासात आरोपी आणि पीडितेची ओळख पार्टीमध्येच झाल्याचे स्पष्ट झाले आहे. विश्वास संपादन करून आरोपीने महिलेला कारमध्ये बसवले आणि त्यानंतर हा धक्कादायक प्रकार घडल्याचे पोलिसांनी सांगितले.
घटनेनंतर पोलिसांनी तातडीने तपासाची चक्रे फिरवली आहेत. परिसरातील सीसीटीव्ही फुटेज ताब्यात घेण्यात आले असून, आरोपीच्या कारचा मार्ग, वाहन क्रमांक आणि त्याचे मोबाईल लोकेशन तपासले जात आहे. पोलिसांकडून तांत्रिक पुरावे गोळा करण्याचे काम सुरू असून, आरोपीला लवकरच अटक केली जाईल असा दावा करण्यात आला आहे.
दरम्यान, कोरेगाव पार्कसारख्या गजबजलेल्या आणि उच्चभ्रू परिसरात घडलेल्या या घटनेमुळे नागरिकांमध्ये भीतीचे वातावरण निर्माण झाले आहे. महिलांनी रात्रीच्या वेळी सुरक्षिततेच्या दृष्टीने अधिक सतर्क राहण्याची गरज व्यक्त केली जात आहे. गेल्या काही दिवसांत पुणे शहरात महिलांवरील अत्याचार, छेडछाड आणि गंभीर गुन्ह्यांच्या घटनांमध्ये वाढ झाल्याने कायदा-सुव्यवस्थेवरही प्रश्नचिन्ह निर्माण झाले आहे.
विशेष म्हणजे, काही दिवसांपूर्वीच भोर तालुक्यातील नसरापूर येथे चिमुकलीवर अत्याचार करून हत्या करण्यात आल्याची घटना ताजी असतानाच आता कोरेगाव पार्कमधील या घटनेने पुन्हा एकदा संताप व्यक्त केला जात आहे. महिला सुरक्षेसाठी कठोर उपाययोजना कराव्यात, रात्रीच्या वेळी गस्त वाढवावी आणि अशा आरोपींवर जलद कारवाई करावी, अशी मागणी विविध स्तरांतून केली जात आहे.
या प्रकरणाचा अधिक तपास कोरेगाव पार्क पोलीस करत असून, आरोपीचा शोध घेण्यासाठी विशेष पथक तयार करण्यात आल्याची माहिती सूत्रांनी दिली आहे.
