पुण्याच्या एअर होस्टेस वर्षा तुरकर हत्या प्रकरणात नवा खुलासा! ६० लाखांसाठी मित्रानेच कट रचल्याचा आईचा संशय; नेमकं प्रकरण काय?


पुणे : पुण्यात वास्तव्यास असलेल्या एअर होस्टेस वर्षा तुरकर यांच्या हत्या प्रकरणाने आता वेगळे वळण घेतले आहे. गोंदिया जिल्ह्यातील जंगल परिसरात दोन दिवसांपूर्वी वर्षा यांची निर्घृण हत्या करण्यात आली होती.

त्या एका ओळखीच्या मित्रासोबत नदी परिसरात फिरायला गेल्या असताना त्यांच्यावर चाकूने हल्ला करण्यात आला. या घटनेत त्यांचा मृत्यू झाला. सुरुवातीला अज्ञात चोरट्यांनी हल्ला केल्याचा दावा करण्यात आला होता. मात्र, आता वर्षा यांच्या कुटुंबीयांनी व्यक्त केलेल्या संशयामुळे तपासाला नवी दिशा मिळाली आहे.

या प्रकरणात नितेश अग्रवाल या वर्षा यांच्या मित्राला पोलिसांनी ताब्यात घेतले असून त्याची चौकशी सुरू आहे. हल्ल्यावेळी नितेशने स्वतःवरही हल्ला झाल्याचा दावा केला होता. मात्र, त्याला कोणतीही गंभीर दुखापत झाली नसल्याने आणि वर्षा यांच्या गळ्यातील सोन्याची चेन सुरक्षित असल्याने त्याच्याबाबत संशय व्यक्त केला जात आहे.

६० लाखांसाठी हत्येची सुपारी दिल्याचा आईचा संशय

महाराष्ट्र टाइम्सने दिलेल्या वृत्तानुसार, वर्षा यांच्या आई प्रमिला तुरकर यांनी नितेश अग्रवाल याच्याबाबत गंभीर संशय व्यक्त केला आहे. वर्षा यांनी अलीकडेच नागपूरमधील आपला फ्लॅट विकला होता. त्यातून मिळालेली रक्कम त्यांनी नितेशला व्यवसाय वाढवण्यासाठी दिल्याचे सांगितले जात आहे. ही रक्कम परत द्यावी लागू नये म्हणून ६० लाख रुपयांची सुपारी देऊन हत्या घडवून आणली असावी, असा संशय त्यांच्या आईने व्यक्त केला आहे.

वर्षाने मित्राला १५ लाख रुपये दिल्याचा पतीचा दावा

दरम्यान, वर्षा यांच्या पतीनेही या प्रकरणात महत्त्वाचा दावा केला आहे. वर्षा यांनी यापूर्वी नितेश अग्रवाल याला १५ लाख रुपये दिले होते. या आर्थिक व्यवहारातूनच त्यांच्या हत्येचा कट रचला गेला असावा, असा संशय पतीने व्यक्त केला आहे. या दाव्यांच्या पार्श्वभूमीवर पोलीस वर्षा यांच्या बँक खात्यातील व्यवहारांची तपासणी करत आहेत.

सीसीटीव्ही आणि कॉल डिटेल्सची तपासणी सुरू

या प्रकरणाचा तपास अत्यंत काळजीपूर्वक केला जात असल्याचे गोंदियाचे पोलीस अधीक्षक गोरख भामरे यांनी सांगितले. वर्षा तुरकर दिवाळीनिमित्त आपल्या मुलीसह मध्य प्रदेशातील बालाघाट जिल्ह्यातील किन्ही येथील माहेरी आल्या होत्या. १४ नोव्हेंबर रोजी त्या नितेश अग्रवाल याच्यासोबत बाहेर गेल्या असताना त्यांच्यावर अनेक वार करण्यात आले. त्यांना तातडीने रुग्णालयात दाखल करण्यात आले; मात्र डॉक्टरांनी मृत घोषित केले.

सध्या पोलीस तपास पथके घटनास्थळाकडे जाणाऱ्या रस्त्यांवरील सीसीटीव्ही फुटेज तपासत आहेत. तसेच संबंधित व्यक्तींचे कॉल डिटेल्स रेकॉर्ड आणि आर्थिक व्यवहारांचीही पडताळणी केली जात आहे. वर्षा यांच्या हत्येमागील नेमके कारण काय आणि या घटनेत आणखी कोणाचा सहभाग आहे का, याचा तपास सुरू आहे. कुटुंबीयांनी व्यक्त केलेले संशय अद्याप तपासातून सिद्ध झालेले नाहीत.

Views:

[jp_post_view]

Leave a Reply

Your email address will not be published. Required fields are marked *

error: Content is protected !!