आमदाराला संपवण्यासाठी ड्रायव्हरलाच पैशांची ऑफर? सोलापुरात भाजप आमदाराच्या हत्येचा कथित कट उघडकीस
सोलापूर : सोलापूर शहरात अक्कलकोट विधानसभा मतदारसंघाचे भाजप आमदार सचिन कल्याणशेट्टी यांच्याबाबत धक्कादायक प्रकार समोर आला आहे. आमदारांवर गोळीबार करून त्यांची हत्या करण्यासाठी त्यांच्या वाहनचालकालाच पैशांचे आमिष दाखवण्यात आल्याचा गंभीर आरोप करण्यात आला आहे. या प्रकारामुळे सोलापूरच्या राजकीय आणि पोलीस वर्तुळात खळबळ उडाली आहे.
मिळालेल्या माहितीनुसार, आमदार सचिन कल्याणशेट्टी यांचे कुटुंबीय खरेदीसाठी सोलापूर शहरातील महावीर चौक परिसरात आले होते. त्यावेळी आमदारांचा वाहनचालक आनंद सुरवसे हा वाहनाजवळ थांबला होता. याचवेळी श्रीशैल हुळळी आणि त्याचा साथीदार फुलारी हे दोघे आनंद सुरवसे याच्याजवळ आले. दोघांनी त्याच्याशी बोलताना आमदारांविरोधात गंभीर प्रस्ताव दिल्याचा आरोप आहे.
तक्रारीनुसार, संशयितांनी आनंद सुरवसे याला पैशांचे मोठे आमिष दाखवत त्याच्याच आमदारांना गोळ्या घालून ठार करण्यास सांगितले. “तुला आम्ही भरपूर पैसे देतो, तू तुझ्या आमदार दादाला गोळ्या घालून मारून टाक. यातून तुझा मोठा फायदा आहे आणि पुढचं काय ते आम्ही बघून घेऊ,” असे दोघांनी सांगितल्याचे तक्रारीत नमूद करण्यात आले आहे. आमदारांचा वाहनचालक असल्यामुळे त्याला जवळून हल्ला करण्याची संधी मिळू शकते, या उद्देशाने ही ऑफर देण्यात आली होती का, याचाही तपास आता महत्त्वाचा ठरणार आहे.
मात्र, आनंद सुरवसे यांनी या कथित हत्येच्या कटात सहभागी होण्यास स्पष्ट नकार दिला. त्यांनी संशयितांना या प्रकाराबाबत जाब विचारण्याचा प्रयत्न केला. मात्र, हा प्रकार उघडकीस येण्याची भीती निर्माण झाल्यानंतर श्रीशैल हुळळी आणि फुलारी यांनी घटनास्थळावरून पळ काढल्याचे तक्रारीत म्हटले आहे.
या घटनेचे गांभीर्य लक्षात घेत आनंद सुरवसे यांनी विलंब न करता सदर बाजार पोलीस ठाणे गाठले. त्यांनी पोलिसांना घडलेला संपूर्ण प्रकार सांगत तक्रार दाखल केली. त्यांच्या तक्रारीच्या आधारे श्रीशैल हुळळी आणि त्याचा साथीदार फुलारी यांच्याविरोधात विविध कलमांन्वये गुन्हा दाखल करण्यात आला आहे.
दरम्यान, या कथित कटामागे नेमका उद्देश काय होता, आमदारांना लक्ष्य करण्याची योजना कुणाच्या सांगण्यावरून आखण्यात आली होती का, संशयितांना या कटासाठी कोणी प्रवृत्त केले होते का आणि या प्रकरणामध्ये आणखी कोणाचा सहभाग आहे का, याचा तपास पोलिसांकडून सुरू आहे. आमदारांच्या हत्येचा कथित प्रयत्न आणि त्यांच्या वाहनचालकालाच हल्ल्यासाठी तयार करण्याचा आरोप असल्याने प्रकरणाची व्याप्ती तपासातून स्पष्ट होणार आहे. पोलिसांच्या तपासानंतर या संपूर्ण प्रकरणामागील नेमके कारण आणि संभाव्य सूत्रधार समोर येतात का, याकडे आता सोलापूरसह राजकीय वर्तुळाचे लक्ष लागले आहे.
