लाडक्या बहिणींच्या खात्यात आता २१०० रुपये येणार? एकनाथ शिंदेंनी जालन्यातून दिले मोठे संकेत; ऑक्टोबरच्या हप्त्याचीही प्रतीक्षा कायम!
जालना : मुख्यमंत्री माझी लाडकी बहीण योजनेच्या लाभार्थी महिलांसाठी महत्त्वाची बातमी समोर आली आहे. सध्या दरमहा मिळणाऱ्या १,५०० रुपयांऐवजी २,१०० रुपये देण्याच्या आश्वासनाबाबत उपमुख्यमंत्री एकनाथ शिंदे यांनी पुन्हा एकदा भूमिका स्पष्ट केली आहे. महायुती सरकार महिलांना दिलेला शब्द पाळणार असून योग्य वेळी २,१०० रुपयांचा लाभ दिला जाईल, असे त्यांनी सांगितले. त्यामुळे वाढीव रक्कम खात्यात कधी जमा होणार, याबाबत महिलांमध्ये उत्सुकता वाढली आहे. मात्र, शिंदे यांनी यासाठी कोणतीही निश्चित तारीख जाहीर केलेली नाही.
२१०० रुपयांबाबत शिंदे नेमकं काय म्हणाले?
एकनाथ शिंदे जालना जिल्ह्याच्या दौऱ्यावर असताना त्यांनी शेतकऱ्यांच्या अडचणी जाणून घेतल्या. यावेळी प्रसारमाध्यमांशी संवाद साधताना लाडकी बहीण योजनेचाही विषय उपस्थित झाला. विधानसभा निवडणुकीच्या वेळी महिलांना दरमहा मिळणारा १,५०० रुपयांचा लाभ वाढवून २,१०० रुपये करण्याचे आश्वासन महायुतीने दिले होते. त्याची आठवण करून दिल्यानंतर शिंदे यांनी सरकार योग्य वेळी वाढीव रक्कम देईल आणि दिलेला शब्द पाळेल, असे स्पष्ट केले.
ऑक्टोबरचा हप्ता अजूनही खात्यात जमा नाही
दुसरीकडे, लाभार्थी महिलांचे लक्ष आता ऑक्टोबर महिन्याच्या हप्त्याकडे लागले आहे. सप्टेंबर महिन्याचे पैसे रखडल्यामुळे महिलांमध्ये संभ्रम होता. त्यानंतर ३ नोव्हेंबरपासून सप्टेंबर महिन्याचे १,५०० रुपये लाभार्थींच्या बँक खात्यांमध्ये जमा करण्याची प्रक्रिया सुरू झाली. मात्र, ऑक्टोबर महिन्याची रक्कम अद्याप मिळालेली नसल्याने पुढील हप्ता कधी येणार, असा प्रश्न महिलांकडून विचारला जात आहे.
दिवाळीपूर्वी सप्टेंबर आणि ऑक्टोबर अशा दोन्ही महिन्यांचे मिळून ३,००० रुपये मिळतील, अशी अपेक्षा व्यक्त केली जात होती. मात्र, सध्या सप्टेंबरचा हप्ता मिळाल्यानंतर ऑक्टोबरच्या पैशांची प्रतीक्षा कायम आहे.
वाढीव रक्कम कधीपासून मिळणार?
सध्या तरी २,१०० रुपये देण्याची तारीख किंवा अंमलबजावणीचे वेळापत्रक सरकारकडून जाहीर करण्यात आलेले नाही. त्यामुळे महिलांना तूर्तास १,५०० रुपयांचाच लाभ मिळत आहे. ऑक्टोबरचा प्रलंबित हप्ता आणि २,१०० रुपयांच्या वाढीव लाभाबाबत सरकार पुढे कोणता निर्णय घेते, याकडे राज्यातील लाखो लाभार्थी महिलांचे लक्ष लागले आहे.
