रविवारी पुणे स्टेशनवर 9 तासांचा मेगाब्लॉक! मुंबई-पुणे डेक्कनसह ‘या’ गाड्या रद्द; प्रवाशांनी आधी वाचा

पुणे : जर तुम्ही येत्या रविवारी (13 सप्टेंबर) रेल्वेने प्रवास करण्याचा बेत आखत असाल, तर ही बातमी तुमच्यासाठी महत्त्वाची आहे. पुणे रेल्वे स्थानकातील यार्डात तांत्रिक कामांसाठी मध्य रेल्वेने 9 तासांचा मेगा ब्लॉक जाहीर केला आहे. हा ब्लॉक सकाळी 8 ते सायंकाळी 5 या वेळेत असणार आहे.

या मेगा ब्लॉकमुळे पुणे-मुंबई डेक्कन एक्सप्रेससह काही लोकल आणि डेमू गाड्या रद्द करण्यात आल्या आहेत. तसेच काही एक्सप्रेस गाड्यांचे मार्ग आणि स्थानकांमधील प्रवास बदलण्यात आला आहे. त्यामुळे रविवारी रेल्वेने प्रवास करणाऱ्या प्रवाशांनी वेळापत्रक तपासूनच प्रवासाचे नियोजन करावे.

का घेतला जात आहे मेगा ब्लॉक?

पुणे-दौंड विभागातील पुणे यार्डमध्ये डी.डी.एस. पॉईंटचे उन्नतीकरण करण्यात येणार आहे. जुन्या रेल्वे रुळांच्या जागी अधिक क्षमतेचे 60 किलो वजनाचे नवीन रेल्वे मार्ग बसवले जाणार आहेत. या कामासाठी विशेष वाहतूक आणि वीज ब्लॉक घेण्यात येणार आहे.

ब्लॉकच्या कालावधीत प्लॅटफॉर्म क्रमांक 1, अप मेन लाईन तसेच सीएसएमटी टोकाकडील डाऊन मेन लाईनवरील रेल्वे वाहतूक पूर्णपणे बंद राहणार आहे.

‘या’ गाड्या पूर्णपणे रद्द

13 सप्टेंबर रोजी धावणाऱ्या काही महत्त्वाच्या गाड्या रद्द करण्यात आल्या आहेत.

लोकल सेवा : पुणे-तळेगाव, तळेगाव-पुणे, पुणे-लोणावळा आणि लोणावळा-शिवाजीनगर लोकल सेवा रद्द करण्यात आल्या आहेत.

एक्सप्रेस आणि डेमू : सीएसएमटी-मुंबई-पुणे डेक्कन एक्सप्रेस, पुणे-मुंबई डेक्कन एक्सप्रेस तसेच पुणे-दौंड डेमू सेवा रद्द राहणार आहेत.

काही गाड्यांचा प्रवास आधीच संपणार

मेगा ब्लॉकमुळे काही एक्सप्रेस गाड्या पुणे मुख्य स्थानकापर्यंत येणार नाहीत. या गाड्यांचा प्रवास आधीच्या स्थानकांवरच संपवण्यात येणार आहे.

हडपसर/खडकी येथे प्रवास संपणार : जयपूर-पुणे एक्सप्रेस, नागपूर-पुणे एक्सप्रेस, अमरावती-पुणे एक्सप्रेस आणि मुंबई-पुणे एक्सप्रेस या गाड्यांचा प्रवास पुण्याऐवजी हडपसर किंवा खडकी येथे संपवला जाणार आहे.

शिवाजीनगर आणि दौंड : लोणावळा-पुणे लोकलचा प्रवास शिवाजीनगर येथे, तर बारामती-पुणे डेमूचा प्रवास दौंड येथेच संपणार आहे.

परतीच्या गाड्याही बदलल्या

पुण्याहून रवाना होणाऱ्या पुणे-जयपूर, पुणे-नागपूर आणि पुणे-मुंबई एक्सप्रेस या गाड्या पुणे मुख्य स्थानकाऐवजी खडकी आणि हडपसर स्थानकांवरून रवाना केल्या जाणार आहेत.

रेल्वे प्रशासनाचे प्रवाशांना आवाहन

रविवारी रेल्वेने प्रवास करणाऱ्या प्रवाशांनी गैरसोय टाळण्यासाठी घराबाहेर पडण्यापूर्वी रेल्वेचे अद्ययावत वेळापत्रक तपासावे, असे आवाहन मध्य रेल्वे प्रशासनाने केले आहे. मेगा ब्लॉकमुळे प्रवासाच्या वेळेत बदल होण्याची शक्यता असल्याने प्रवाशांनी त्यानुसार नियोजन करण्याचे आवाहन करण्यात आले आहे.