RBI चा मोठा निर्णय! घर आणि वाहन कर्जाचा EMI वाढला की कमी झाला? लगेच जाणून घ्या…

नवी दिल्ली : दरमहा गृहकर्ज, वाहन कर्ज किंवा इतर कोणत्याही कर्जाचा ईएमआय भरणाऱ्या लाखो ग्राहकांसाठी रिझर्व्ह बँकेने मोठा निर्णय घेतला आहे. मध्य पूर्वेतील तणावपूर्ण परिस्थिती आणि जागतिक आर्थिक घडामोडींच्या पार्श्वभूमीवर आरबीआयने सलग पाचव्यांदा रेपो दर 5.25 टक्क्यांवर कायम ठेवण्याचा निर्णय घेतला आहे.

आरबीआयचे गव्हर्नर संजय मल्होत्रा यांनी तिसऱ्या द्वैमासिक पतधोरण आढाव्यानंतर ही घोषणा केली. रेपो दरात कोणताही बदल न झाल्याने गृहकर्ज, वाहन कर्ज आणि इतर कर्जांच्या ईएमआयमध्ये तातडीने कोणताही बदल होणार नाही. म्हणजेच ग्राहकांना सध्या पूर्वीप्रमाणेच हप्ते भरावे लागतील.

पतधोरण समितीच्या बैठकीत आरबीआयने महागाई नियंत्रणात ठेवणे आणि आर्थिक वाढ कायम राखणे यावर भर दिला. या घोषणेपूर्वी देशांतर्गत शेअर बाजारातही सकारात्मक वातावरण पाहायला मिळाले.

ऑक्टोबर 2025 नंतर रेपो दरात बदल नाही

आरबीआयने शेवटचा रेपो दर ऑक्टोबर 2025 मध्ये 25 बेसिस पॉइंट्सने कमी केला होता. त्यानंतर डिसेंबर, फेब्रुवारी, एप्रिल, जून आणि आता ऑगस्टच्या पतधोरण आढाव्यातही रेपो दर 5.25 टक्क्यांवरच कायम ठेवण्यात आला आहे.

रेपो दर म्हणजे काय?

रेपो दर म्हणजे आरबीआय ज्या व्याजदराने बँकांना अल्पकालीन कर्ज उपलब्ध करून देते तो दर. रेपो दर वाढल्यास बँकांच्या कर्जाचा खर्च वाढतो आणि त्याचा परिणाम गृहकर्ज, वाहन कर्ज तसेच वैयक्तिक कर्जाच्या व्याजदरांवर आणि ईएमआयवर होतो. तर रेपो दर स्थिर राहिल्यास ग्राहकांच्या विद्यमान ईएमआयमध्ये तातडीने बदल होत नाही.