विधान परिषद रणसंग्राम तापला! महायुतीत जागांवरून मोठा वाद, शिंदे गट 7 जागांवर अडून बसला
मुंबई : राज्याच्या राजकीय पाटावर पुन्हा एकदा मोठा गोंधळ उभा राहिला आहे. विधान परिषदेच्या 17 जागांसाठी निवडणूक जाहीर होताच महायुतीमध्ये जागावाटपावरून खडाखडी सुरू झाली असून वातावरण चांगलंच तापलं आहे. “कोणाला किती वाटा मिळणार?” हा प्रश्न आता थेट चर्चेच्या केंद्रस्थानी आला आहे.
सूत्रांच्या माहितीनुसार, उपमुख्यमंत्री एकनाथ शिंदे यांच्या नेतृत्वातील शिवसेना शिंदे गटाने यावेळी थेट 7 जागांवर ठाम दावा केला आहे. आधीच्या 5 जागा आणि नव्याने वाढलेल्या 2 जागांचा हिशोब मांडत शिवसेनेने भाजपसमोर प्रस्ताव ठेवला होता. मात्र या मागणीवर भाजपकडून अद्याप हिरवा कंदील मिळालेला नाही.
दुसरीकडे, भाजपकडून सध्या शिवसेनेला केवळ 3 ते 4 जागा देण्याचा प्रस्ताव पुढे आला आहे. त्यामुळे दोन्ही पक्षांमध्ये “वाटपाचं गणित” जुळत नसल्याने महायुतीत तणाव वाढला आहे.
शिवसेना शिंदे गट मात्र यावेळी पूर्णपणे आक्रमक भूमिकेत आहे. “आता माघार नाही” असा पवित्रा घेत पक्षातील नेत्यांनी 7 जागांवर ठाम राहण्याचा निर्णय घेतला आहे. मागील निवडणुकांमध्ये कमी जागांवर झालेली तडजोड आता मान्य नसल्याची खंतही कार्यकर्त्यांमध्ये दिसत आहे.
राजकीय वर्तुळात चर्चा अशीही आहे की, महायुतीचा जुना फॉर्म्युला भाजप 12, शिवसेना 3 आणि राष्ट्रवादी 2 असा होता. मात्र बदललेल्या राजकीय ताकदीमुळे आता प्रत्येक पक्ष आपला वाटा वाढवण्यासाठी जोर लावत आहे.
या सगळ्या घडामोडींमुळे महायुतीत “एकत्र चालायचं पण वाटपावरून भांडण” अशी गावाकडच्या भाषेत म्हणावी तशी अवस्था झाली आहे.
दरम्यान, या निवडणुकीसाठी उमेदवारी अर्ज 25 मे ते 1 जून दरम्यान भरले जाणार आहेत. 2 जूनला छाननी, 18 जूनला मतदान आणि 22 जूनला मतमोजणी होणार आहे. त्यामुळे पुढील काही दिवसांत हा जागावाटपाचा तिढा सुटतो की अजून वाढतो, याकडे संपूर्ण महाराष्ट्राचं लक्ष लागलं आहे.
