हॉटेल असो वा मेडिकल… गैरप्रकार दिसला की फक्त QR कोड स्कॅन करा! एका क्लिकवर थेट अधिकाऱ्यांकडे तक्रार
बेंगळुरू : हॉटेलमधील अस्वच्छता, खाद्यपदार्थातील भेसळ, रस्त्यावरची विनापरवाना खाद्यविक्री किंवा मेडिकलमधील मुदतबाह्य औषधांची विक्री… अशा प्रकारांविरोधात आता नागरिकांना प्रशासनाकडे तक्रार करणे अधिक सोपे होणार आहे. कर्नाटकच्या अन्न व औषध प्रशासन विभागाने नागरिकांसाठी क्यूआर कोड आधारित तक्रार व्यवस्था सुरू केली आहे. सेंटर फॉर ई-गव्हर्नन्सच्या सहकार्याने हा उपक्रम राबवण्यात येत असून, क्यूआर कोड स्कॅन केल्यानंतर नागरिकांना अन्न व औषधांशी संबंधित तक्रारी थेट संबंधित अधिकाऱ्यांपर्यंत पोहोचवता येणार आहेत.
या डिजिटल सुविधेमुळे ग्राहकांना अनेक प्रकारच्या गैरप्रकारांची माहिती प्रशासनाला देता येईल. ज्या हॉटेल, रेस्टॉरंट किंवा खाद्यपदार्थ विक्रीच्या ठिकाणी स्वच्छतेचे नियम पाळले जात नाहीत, तेथे डास, झुरळे किंवा उंदीरांचा प्रादुर्भाव आहे, अशा ठिकाणांची तक्रार करता येणार आहे. एखाद्या खाद्यपदार्थात भेसळ असल्याचा संशय असल्यास त्याची माहितीही प्रशासनापर्यंत पोहोचवता येईल. तसेच रस्त्यावर किंवा फुटपाथवर विनापरवाना खाद्यपदार्थांची विक्री होत असल्यास त्याविरोधातही तक्रार नोंदवता येणार आहे.
मेडिकलमधील गैरप्रकारांवरही नजर ठेवता येणार आहे. एखाद्या औषधामुळे दुष्परिणाम जाणवत असल्यास, मेडिकलमध्ये औषधाच्या मूळ किमतीपेक्षा जास्त पैसे आकारले जात असल्यास किंवा मुदत संपलेली औषधे विकली जात असल्याचे निदर्शनास आल्यास नागरिक तक्रार करू शकतात. याशिवाय इतर फार्मसी सेवांशी संबंधित तक्रारींसाठीही या व्यवस्थेचा उपयोग करता येईल.
अधिकाऱ्यांच्या माहितीनुसार, क्यूआर कोड प्रणालीमुळे तक्रारी थेट प्रशासनापर्यंत पोहोचल्याने पारदर्शकता वाढण्यास मदत होईल. संबंधित ठिकाणी आढळणाऱ्या समस्या वेळीच समोर आल्यास त्यावर तातडीने कारवाई करणेही शक्य होणार आहे. हॉटेल्स, रेस्टॉरंट्स, रस्त्यावरील खाद्यपदार्थ विक्रीची ठिकाणे तसेच शासकीय आणि खासगी संस्थांमध्ये ही डिजिटल व्यवस्था उपलब्ध करून देण्यात आली आहे.
यासोबतच कर्नाटक अन्न व औषध प्रशासनाने डिजिटल सेवांचा विस्तार करत डी-फार्माच्या विद्यार्थ्यांसाठी ई-मार्क्स आणि डी-फार्मसी धारकांसाठी ई-सर्टिफिकेटची सुविधाही उपलब्ध केली आहे.
अन्न सुरक्षा किंवा भेसळीसंबंधी तक्रार नोंदवण्यासाठी नागरिक फूड सेफ्टी कनेक्ट या राष्ट्रीय अन्न सुरक्षा पोर्टलचा वापर करू शकतात. याशिवाय एफएसएसएआयच्या १८००११२१०० या टोल-फ्री क्रमांकावर किंवा ९८६८६८६८६८ या व्हॉट्सॲप क्रमांकावर संपर्क साधता येतो. त्यामुळे खाद्यपदार्थ किंवा औषधांबाबत गैरप्रकार दिसल्यास आता तक्रार करण्यासाठी नागरिकांच्या हातात थेट डिजिटल पर्याय उपलब्ध झाला आहे.
