आज-उद्या बँकेत जाणार असाल तर आधी सुट्ट्यांची यादी पाहा! कोणत्या शहरांत बँका बंद?
पुणे : दिवाळीच्या काळात अनेक ठिकाणी सणांनिमित्त सुट्ट्या असतात. याचा परिणाम बँकांच्या कामकाजावरही होतो. त्यामुळे नोव्हेंबर महिन्यात बँका नेमक्या कोणत्या दिवशी बंद राहणार, याबाबत ग्राहकांमध्ये संभ्रम आहे.
विशेषतः ९, १० आणि ११ नोव्हेंबर रोजी बँका सुरू असतील की बंद, असा प्रश्न अनेकांना पडला आहे. यंदा दिवाळी रविवार, ८ नोव्हेंबर रोजी साजरी झाली. रविवार असल्याने देशभरातील बँकांना आधीच साप्ताहिक सुट्टी होती.
मात्र, दिवाळी आणि त्यानंतरच्या सणांमुळे नोव्हेंबरच्या दुसऱ्या आठवड्यात देशातील विविध राज्यांमध्ये बँकांना सुट्ट्या असणार आहेत. काही राज्यांमध्ये ९ नोव्हेंबरला, तर काही ठिकाणी १० आणि ११ नोव्हेंबरला बँका बंद राहतील. याशिवाय दुसरा शनिवार आणि रविवार असल्यानेही बँकांचे कामकाज बंद राहणार आहे.
महत्त्वाचे म्हणजे, सणांचे दिवस आणि त्यानुसार जाहीर होणाऱ्या बँकांच्या सुट्ट्या राज्यानुसार वेगवेगळ्या असतात. त्यामुळे बँकेच्या शाखेत जाण्यापूर्वी सुट्ट्यांचे वेळापत्रक तपासणे आवश्यक आहे. चला तर मग, ९ आणि १० नोव्हेंबर रोजी कोणत्या शहरांमध्ये बँका बंद राहणार, हे जाणून घेऊया.
९ नोव्हेंबर रोजी कोणत्या शहरांमध्ये बँका बंद?
दिवाळी, लक्ष्मीपूजन आणि गोवर्धन पूजेनिमित्त सोमवार, ९ नोव्हेंबर रोजी आगरतळा, भोपाळ, चंदीगड, गंगटोक, गुवाहाटी, इम्फाळ, जयपूर, कानपूर, लखनऊ आणि रायपूर येथील बँकांच्या शाखा बंद राहतील. त्यामुळे या शहरांतील ग्राहकांना बँकेशी संबंधित कामांसाठी दुसऱ्या दिवसाची वाट पाहावी लागू शकते.
१० नोव्हेंबर रोजी कुठे बँकांना सुट्टी?
दिवाळी बलीप्रतिपदा आणि विक्रम संवत नववर्षानिमित्त मंगळवार, १० नोव्हेंबर रोजी अहमदाबाद, बेलापूर (नवी मुंबई), बेंगळुरू, डेहराडून, गंगटोक, मुंबई आणि नागपूर येथील बँका बंद राहणार आहेत.
नोव्हेंबर २०२६ मध्ये बँकांना कोणत्या दिवशी सुट्ट्या?
नोव्हेंबर महिन्यात दिवाळी, गोवर्धन पूजा, लक्ष्मीपूजन, बलीप्रतिपदा, छठ पूजा, गुरु नानक जयंती, कार्तिक पौर्णिमा यांसह विविध सण आणि उत्सवांमुळे वेगवेगळ्या राज्यांमध्ये बँकांना सुट्ट्या असतील.
याशिवाय देशातील सर्व शेड्युल्ड आणि नॉन-शेड्युल्ड बँकांना प्रत्येक महिन्याच्या दुसऱ्या आणि चौथ्या शनिवारी सार्वजनिक सुट्टी असते. तसेच रविवारच्या दिवशीही बँका बंद असतात.
त्यामुळे बँकेत जाण्यापूर्वी आपल्या शहरातील सुट्ट्यांची यादी तपासूनच घराबाहेर पडणे फायदेशीर ठरेल.
