मी दोनदा मरता मरता वाचलो, आता फक्त डोळ्याचं…धनंजय मुंडेंचा भावनिक खुलासा
परळी : राष्ट्रवादी काँग्रेसचे नेते आणि आमदार धनंजय मुंडे यांनी परळी तालुक्यातील बोधेगाव येथील एका कार्यक्रमात आपल्या आयुष्यातील एका अत्यंत कठीण काळाबद्दल भाष्य केले आहे.
ज्या घटनेशी आपला कोणताही संबंध नव्हता, त्या घटनेवरून सलग २५० दिवस इलेक्ट्रॉनिक मीडियावर माझी ट्रायल चालली. त्या अत्यंत कठीण काळात मी दोनदा मरता मरता वाचलो होतो. आज मी तुमच्या आशीर्वादामुळेच तुमच्यासमोर उभा आहे, असे माजी मंत्री तसेच आमदार धनंजय मुंडे म्हणाले.
धनंजय मुंडे यांनी बोधेगाव येथे विविध विकास कामांच्या लोकार्पण सोहळ्यानिमित्त एक कार्यक्रम आयोजित केला होता. यावेळी त्यांनी त्यांच्या जीवनातील संघर्षाच्या आठवणींना उजाळा दिला. माझा जन्म लोकांची सेवा करण्यासाठी झाला, असे धनंजय मुंडे म्हणाले.
त्या कठीण काळात मी कुठल्याही माध्यमांवर बोललो नाही. मी प्रामाणिकपणे सांगतो, मी सगळ्या आजारांतून बाहेर पडलो आहे, फक्त आता डोळ्याचे थोडे बाकी आहे. पण माझा जन्म लोकांची सेवा करण्यासाठी झाला आहे, म्हणूनच मी आज तुमच्यासमोर आहे. मला फक्त तुमची सेवा करायची आहे, दुसरे काही नाही, असे धनंजय मुंडे यांनी सांगितले.
दरम्यान, यावेळी त्यांनी नुकत्याच झालेल्या विधानसभा निवडणुकीतील आपल्या विक्रमी विजयाचाही उल्लेख केला. “मायबाप जनतेने मला १ लाख ४२ हजार मतांच्या प्रचंड आघाडीने निवडून दिले, महाराष्ट्रात हा सर्वाधिक मताधिक्याचा विजय आहे. पण एवढा मोठा विजय मिळूनही, आलेल्या संकटांमुळे तो साजरा करता आला नाही, अशी खंत त्यांनी व्यक्त केली आहे.
