हृदयद्रावक! मासिक पाळीचा त्रास असह्य, १८ वर्षांच्या तरुणीने संपवलं आयुष्य…
हरियाणा : एका १८ वर्षांच्या मुलीने मासिक पाळीच्या वेळी होणाऱ्या त्रासामुळे आपल्या आयुष्याची अखेर केली आहे. हरियाणाच्या पानिपत जिल्ह्यात ही हृदयद्रावक घटना समोर आली आहे. या घटनेने तिच्या कुटुंबांवर दुःखाचा डोंगर कोसळला आहे.
मृत तरुणीचं नाव अन्नू असून तिने नुकत्याच दहा दिवसांपूर्वी आपला १८ वा वाढदिवस साजरा केला होता. अन्नूचा वाढदिवस १४ जुलै रोजी होता. यावर्षी ती १८ वर्षांची झाली होती. या प्रकरणाची माहिती मिळताच पोलिसांनी घटनास्थळी पोहोचून मृतदेह ताब्यात घेत शवविच्छेदनासाठी पाठवला.
मिळालेल्या माहिती नुसार, अन्नूचे वडील सुरेंद्र मजूर म्हणून काम करतात. त्यांनी सांगितले की त्यांना चार मुले आहेत. अन्नू त्यांच्या चार मुलांपैकी सर्वात मोठी होती. तिने १२ वी उत्तीर्ण केली होती आणि संगणक अभ्यासक्रमासोबत आयटीआयमध्ये प्रवेश घेतला होता. घटनेच्या दिवशी ते त्यांच्या धाकट्या मुलीला अपंगत्व प्रमाणपत्र काढण्यासाठी सरकारी रुग्णालयात घेऊन गेले होते.
वडिलांनी सांगितलं की, दुपारी साडे चार वाजता घरी परतल्यावर अन्नू माझ्यासाठी चहा बनवून वरच्या खोलीत गेली. काही वेळाने मी वरच्या मजल्यावर गेलो तेव्हा मला खोलीचा दरवाजा अर्धा उघडा दिसला. मी आत जाऊन पाहिलं तर अन्नू तिच्या दुपट्ट्याच्या मदतीने पंख्याला गळफास घेतलेली दिसली. मी ताबडतोब पोलिसांना याची माहिती दिली.
वडिलांनी सांगितले की, अन्नूला बऱ्याच काळापासून मासिक पाळीशी संबंधित शारीरिक समस्या होत्या आणि तिच्यावर उपचारही सुरू होते. परंतु नियमित उपचार करूनही त्यात हवी तशी सुधारणा होत नव्हती. यामुळे तिला मानसिक त्रास होऊ लागला होता.
या तणावामुळे तिने हे टोकाचं पाऊल उचललं, असं तिच्या वडिलांनी सांगितलं.वडिलांच्या जबाबावरून पोलिसांनी याप्रकणाची नोंद केली असून शवविच्छेदनानंतर मृतदेह कुटुंबाकडे सोपवण्यात आला आहे. या प्रकरणाची चौकशी सुरू असल्याचे पोलिसांनी सांगितले.
