नवरदेवांनो काळजी घ्या! लुटेरी दुल्हन गँग राज्यात सक्रिय, लग्न लागलं अन् २ तासांत पळाली नवरी, नवरोबाला ५ लाखांना चुना, नेमकं घडलं काय?
जालना : मराठवाड्यात लुटेरी दुल्हन गँग सक्रीय झाल्याचे चित्र आहे. जालना जिल्ह्यातील एका तरुणाची अशीच फसवणूक झाली असून तब्बल पाच लाख रुपयांना चुना लागला आहे. शहरापासून हाकेच्या अंतरावर असलेल्या माळाच्या गणपती इथे २१ मार्च रोजी विवाह संपन्न झाला.
विवाह सोहळा संपन्न झाल्यानंतर अवघ्या दोनच तासांमध्ये नवरीने ५ लाखांसह दुसऱ्या एका कारमध्ये बसून पोबारा केल्याचा प्रकार पुढे आला आहे. मंठा येथे १६ मार्च रोजी मुलगी पाहण्याचा कार्यक्रम पार पडला. यानंतर २१ मार्च रोजी नाव्हा रोडवरील माळाचा गणपती इथे हे लग्न झाले.
दरम्यान, नातेवाइकांना भेटायचे म्हणून दुसऱ्या वाहनात जाऊन बसत ५ लाख रुपये घेऊन नवरी व तिच्यासोबत असलेले नातेवाईक फरार झाले. या घटनेतून ‘लुटेरी दुल्हन’ पुन्हा सक्रिय झाल्याचे पुढे आले आहे. या प्रकरणात नवरी, तिची बहीण, तिची आई, मामा अशा चार जणांविरुद्ध तालुका पोलिस ठाण्यात गुन्हा दाखल करण्यात आला आहे.
मराठवाड्यात लग्नातून फसवणुकीचे प्रकार वाढले आहेत. लग्नासाठीची मुलगी आणि तिचे नातेवाईक यांचे आधारकार्ड बनावट असते. त्यामुळे पोलिसांना तपासात देखील अडचणी येतात. गणपती माळ येथे लागलेल्या या लग्नाच्या प्रकरणात लग्न लावून देणारे महाराज यांनी कोणत्या कागदपत्रांच्या आधारे लग्न लावले, या कागदपत्रांचीही पोलिसांच्या तपासाला मदत होणार आहे
नेमकं काय घडलं?
बदनापूर तालुक्यातील सदाशिव वेताळ हे भावाच्या लग्नासाठी मुलीचा शोध घेत होते. दरम्यान, नातेवाइकांकडे मुलाचा बायोडाटाही पाठवला होता. एका महिलेने फोनवर संपर्क करून आमच्याकडे मुलगी आहे म्हणत व्हॉट्सॲपवर मुलीचे फोटो पाठवले.
यानंतर १६ मार्च रोजी मंठ्यात जाऊन मुलगी बघण्याचा कार्यक्रम झाला. २१ मार्च रोजी दुपारी १२ वाजेच्या सुमारास माळाचा गणपती मंदिरात लग्न लागले. नवरीला कारमधून गावाकडे घेऊन जात होते. जालना शहरातील मंठा चौफुलीजवळ दुसऱ्या कारच्या चालकाने नवरी असलेल्या कारच्या चालकाला इशारा करत थांबायला लावले.
नवरी व तिच्यासोबत असलेल्या मुलीने आम्ही नातेवाइकांना भेटून येतो, असे म्हणत गाडीखाली उतरून त्या दुसऱ्या कारमध्ये जाऊन बसल्या. यानंतर ते कारने पळून गेले. या प्रकरणात तालुका पोलिस ठाण्यात गुन्हा दाखल करण्यात आला आहे.
