अर्धवट घरांना पुन्हा मिळणार आधार! घरकुल लाभार्थ्यांसाठी सरकारचा मोठा निर्णय
मुंबई : भिंती उभ्या राहिल्या… छप्पर टाकायचं बाकी राहिलं… आणि हप्त्यांची वाट पाहत अनेक गरीब कुटुंबांची घरकुलं महिनोनमहिने अर्धवट अवस्थेत उभी होती. अखेर अशा हजारो लाभार्थ्यांसाठी दिलासादायक बातमी समोर आली आहे. प्रधानमंत्री आवास योजना ग्रामीण (PMAY-G) अंतर्गत प्रलंबित घरकुल हप्त्यांच्या निधीला शासनाने मंजुरी दिली असून, लवकरच लाभार्थ्यांच्या खात्यात रक्कम जमा होणार आहे.
ग्रामीण भागातील गरीब, शेतकरी, शेतमजूर आणि आर्थिकदृष्ट्या दुर्बल कुटुंबांना सुरक्षित पक्के घर मिळावे या उद्देशाने केंद्र सरकारकडून प्रधानमंत्री आवास योजना ग्रामीण राबवली जाते. मात्र अनेक ठिकाणी पुढील हप्ते वेळेत न मिळाल्याने बांधकामे रखडली होती. काही लाभार्थ्यांना वाढत्या महागाईमुळे स्वतःच्या पैशातून काम पुढे नेणेही अशक्य झाले होते.
आता शासनाने नवीन निधी वितरणाला मंजुरी दिल्याने रखडलेल्या घरकुलांना पुन्हा गती मिळणार आहे. घर मंजूर झाल्यानंतर पहिला हप्ता, बांधकाम सुरू झाल्यावर दुसरा आणि काम पूर्ण झाल्यावर अंतिम हप्ता थेट लाभार्थ्यांच्या बँक खात्यात जमा केला जातो. त्यामुळे मध्यस्थांचा हस्तक्षेप कमी होऊन प्रक्रिया अधिक पारदर्शक बनली आहे.
दरम्यान, अनेक नागरिकांना आपले नाव लाभार्थी यादीत आहे की नाही, याबाबत संभ्रम असतो. पूर्वी यासाठी ग्रामपंचायत किंवा तालुका कार्यालयाच्या फेऱ्या माराव्या लागत होत्या. मात्र आता केंद्र सरकारने ही प्रक्रिया ऑनलाइन उपलब्ध करून दिली आहे.
लाभार्थी यादी कशी तपासाल?
• PMAY MIS Portal उघडा
• “AwaasSoft” मधील “Reports” पर्याय निवडा
• “Social Audit Reports” वर क्लिक करा
• “Beneficiary Details for Verification” निवडा
• राज्य, जिल्हा, तालुका आणि गाव निवडा
• कॅप्चा भरून “Submit” करा
यानंतर संपूर्ण लाभार्थी यादी स्क्रीनवर दिसेल. यामध्ये लाभार्थ्याचे नाव, मंजुरी क्रमांक, बांधकामाची स्थिती आणि हप्त्यांची माहिती पाहता येते.
ग्रामीण भागातील अनेक कुटुंबांसाठी स्वतःचे पक्के घर हे आजही आयुष्यभराचे स्वप्न असते. शासनाच्या या निर्णयामुळे हजारो कुटुंबांच्या अपूर्ण घरांना आता पुन्हा आशेचा आधार मिळणार आहे.
