PAN कार्ड हरवलं? आता फक्त 2 मिनिटांत मोफत मिळवा e-PAN! घरबसल्या डाउनलोडची सोपी प्रक्रिया जाणून घ्या

पुणे : डिजिटल युगात PAN कार्ड हे अत्यावश्यक आर्थिक दस्तऐवज बनले आहे. बँक खाते उघडणे, मोठे आर्थिक व्यवहार, ITR भरणे, कर्ज किंवा क्रेडिट कार्डसाठी PAN अनिवार्य आहे. मात्र अनेकदा PAN कार्ड हरवणे किंवा खराब होणे यामुळे अडचण निर्माण होते. आता या समस्येवर उपाय म्हणून आयकर विभागाने e-PAN सुविधा उपलब्ध करून दिली आहे, ज्याद्वारे अवघ्या काही मिनिटांत मोफत PAN कार्ड डाउनलोड करता येते.

e-PAN हे प्रत्यक्ष PAN कार्डचे डिजिटल आणि अधिकृत स्वरूप आहे. आयकर विभागाच्या नियमानुसार ते पूर्णपणे वैध मानले जाते. नवीन अर्जदारांना Instant e-PAN मिळतो, तर जुने PAN धारक NSDL किंवा UTIITSL च्या वेबसाइटवरून ते पुन्हा डाउनलोड करू शकतात.

ही प्रक्रिया अत्यंत सोपी आहे. सर्वप्रथम [www.incometax.gov.in](http://www.incometax.gov.in) या अधिकृत ई-फायलिंग पोर्टलला भेट द्या. त्यानंतर ‘Quick Links’ विभागातील ‘Instant e-PAN’ या पर्यायावर क्लिक करा. पुढे ‘Check Status / Download PAN’ निवडून आधार क्रमांक टाका. नंतर नोंदणीकृत मोबाईलवर आलेला OTP टाकून पडताळणी पूर्ण करा.

OTP यशस्वी झाल्यानंतर स्क्रीनवर तुमचे e-PAN दिसेल. त्यानंतर ‘Download e-PAN’ वर क्लिक करून ते PDF स्वरूपात मोबाईल किंवा कॉम्प्युटरमध्ये सेव्ह करता येते. ही सेवा पूर्णपणे मोफत असून कोणताही शुल्क लागत नाही.

e-PAN चा वापर बँक खाते उघडणे, 50,000 रुपयांपेक्षा जास्त व्यवहार, ITR फाइलिंग, शेअर बाजार गुंतवणूक, म्युच्युअल फंड KYC आणि कर्ज अर्ज यासाठी करता येतो. डिजिटल स्वरूपामुळे कार्ड हरवण्याची किंवा खराब होण्याची भीतीही राहत नाही.