गौतमी पाटीलला ‘या’ घटनेप्रकरणी मोठा दिलासा, पुणे पोलिसांकडून क्लीन चिट, नेमकं प्रकरण काय?
पुणे : गौतमी पाटीलला पुणे पोलिसांनी एका अपघात प्रकरणात क्लीन चिट दिली आहे. अपघात घडला त्यावेळी गौतमी पाटील संबंधित गाडीमध्ये उपस्थित नव्हती, अशी माहिती पोलिसांनी दिली आहे. एका रिक्षाला धडक दिल्याप्रकरणी चालकावर गुन्हा दाखल करण्यात आला आहे.
अपघातावेळी गौतमी पाटील वाहनात नव्हती, अशी माहिती पुणे पोलिसांच्या तपासातून समोर आली आहे. त्यामुळे पुणे पोलिसांकडून गौतमी पाटील हिला क्लीन चिट देण्यात आली आहे. या अपघातामध्ये जखमी झालेल्या रिक्षाचालकाच्या कुटुंबीयांकडून गौतमी पाटील हिच्यावर कठोर कारवाई करण्याची मागणी केली जात होती.
त्यामुळे हे प्रकरण प्रचंड तापले होते. अपघाताच्यावेळी गौतमी पाटील गाडीत होती की नाही, हे तपासण्यासाठी पुणे पोलिसांनी तब्बल १०० सीसीटीव्हींचे फुटेज पडताळले. त्यामध्ये अपघातावेळी फक्त गौतमी पाटीलचा चालक हाच कारमध्ये उपस्थित असल्याचे स्पष्ट झाले आहे.
गौतमी पाटील हिच्या मालकीच्या कारने 30 सप्टेंबरला पहाटे एका रिक्षाला धडक दिली होती. यामध्ये रिक्षाचालक सामाजी विठ्ठल मरगळे गंभीर जखमी झाला होता. या रिक्षाचालकाच्या नातेवाईकांनी पोलीस ठाण्यात ठिय्या देत गौतमी पाटील हिच्यावर कठोर कारवाई करण्याची मागणी केली होती.
गौतमी पाटील ही सेलिब्रिटी असल्याने तिच्याविरुद्ध कारवाई करताना चालढकल केली जात आहे, असा आरोपही झाला होता. तर कोथरुडचे आमदार चंद्रकांत पाटील यांनीही याप्रकरणात तातडीने कारवाई करण्याच्या सूचना पुणे पोलिसांना दिल्या होत्या.
त्यामुळे हे प्रकरण प्रचंड तापले होते. या अपघात प्रकरणात गौतमी पाटील हिला शुक्रवारी नोटीस धाडली होती. तसेच या प्रकरणाच्या चौकशीसाठी एका विशेष पोलीस अधिकाऱ्याची नियुक्ती करण्यात आली होती. मात्र, या सगळ्या तपासानंतर पोलिसांकडून आता गौतमी पाटील हिला क्लीन चिट देण्यात आली आहे.
