‘I am a good fool’… संजीव सोनवणेंच्या शेवटच्या पत्रातील त्या 4 शब्दांनी खळबळ; हस्ताक्षर त्यांचंच की आणखी काही? पोलिसांकडून तज्ज्ञांची मदत

लातूर : लातूरमधील प्रसिद्ध शिक्षण संस्थाचालक संजीव सोनवणे यांच्या मृत्यूच्या प्रकरणाने आता वेगळेच वळण घेतले आहे. पद्मनगर येथील त्यांच्या राहत्या घरात मंगळवारी सकाळी ते मृतावस्थेत आढळले. घटनास्थळी त्यांच्या जवळ परवानाधारक रिव्हॉल्व्हर आणि एक पत्र सापडले. या पत्रातील मजकुरामुळे पोलिसांचा तपास अधिक बारकाईने सुरू असून, विशेषतः शेवटी लिहिलेल्या ‘I am a good fool’ या वाक्याकडे लक्ष वेधले गेले आहे.

मिळालेल्या माहितीनुसार, सोमवारी रात्री संजीव सोनवणे घरी एकटे होते. त्यांची पत्नी सुचेता, मुलगा दिग्विजय, मुलगी क्षमा आणि जावई अमेरिकेत असल्याचे सांगण्यात आले आहे. रात्री त्यांच्या चालकाने त्यांना जेवणाचा डबा आणून दिला होता. त्यानंतर दुसऱ्या दिवशी सोनवणे यांची बहीण घरी पोहोचली. गेट उघडल्यानंतर तिने आवाज दिला, मात्र घरातून कोणताही प्रतिसाद मिळाला नाही. त्यामुळे ती घराच्या दुसऱ्या मजल्यावर गेली असता शयनकक्षात सोनवणे मृतावस्थेत असल्याचे दिसून आले.

यानंतर पोलिसांना घटनास्थळी एक पत्र मिळाले. या पत्रात आपल्या मृत्यूला कोणालाही जबाबदार धरू नये, कोणाचाही तपास करू नये आणि कोणालाही त्रास देऊ नये, अशा आशयाचा मजकूर असल्याचे समोर आले आहे. पत्राच्या शेवटी ‘I am a good fool’ असे लिहून स्वाक्षरी करण्यात आली आहे. याच शेवटच्या वाक्यामुळे प्रकरणाबाबत अनेक प्रश्न उपस्थित झाले आहेत. या शब्दांचा नेमका संदर्भ काय होता, याची सध्या निश्चित माहिती समोर आलेली नाही.

विशेष म्हणजे, सोनवणे यांच्या नातेवाइकांनी पत्रातील हस्ताक्षर त्यांचेच असल्याचे पोलिसांना सांगितले आहे. मात्र, पोलिसांनी अद्याप या हस्ताक्षराला अंतिम मान्यता दिलेली नाही. पत्र प्रत्यक्षात सोनवणे यांनीच लिहिले होते का, याची खात्री करण्यासाठी हस्ताक्षर तज्ज्ञांची मदत घेतली जात आहे. त्यासाठी सोनवणे यांच्या हस्ताक्षराचे नमुने आणि पत्रातील लिखाण यांची तुलना केली जाणार आहे.

‘I am a good fool’ या वाक्याचा अर्थ संदर्भानुसार वेगवेगळा असू शकतो. एखाद्याने स्वतःला भोळा, सहज विश्वास ठेवणारा किंवा स्वतःलाच दोष देणारा म्हणण्याच्या अर्थाने हा शब्दप्रयोग केला असण्याची शक्यता व्यक्त केली जात आहे. मात्र, या एका वाक्यावरून कोणताही निष्कर्ष काढणे योग्य ठरणार नाही. त्यामुळे पोलिसांकडून पत्रातील प्रत्येक बाब तपासली जात आहे.

दरम्यान, संजीव सोनवणे यांच्या मृत्यूची परिस्थिती, घटनास्थळावरील पुरावे, पत्राचा मजकूर आणि हस्ताक्षराची सत्यता या सर्व बाबींचा एकत्रित तपास केला जात आहे. हस्ताक्षर तज्ज्ञांचा अहवाल आल्यानंतर पत्राबाबत अधिक स्पष्टता मिळण्याची शक्यता आहे. त्यामुळे सध्या पत्रातील त्या एका वाक्यामुळे चर्चा रंगली असली, तरी पोलिसांच्या तपासातूनच त्यामागील नेमका संदर्भ स्पष्ट होणार आहे.