आधी मोदींना निमंत्रण, आता बारामती दौऱ्यालाच पूर्णविराम! शरद पवारांनी अचानक जाहीर केली १२ डिसेंबरची तारीख; प्रेरणास्थळाच्या उद्घाटनाचा मोठा निर्णय!

बारामती : पंतप्रधान नरेंद्र मोदी बारामतीत येणार की नाही, याबाबत सुरू असलेल्या चर्चांना अखेर नवे वळण मिळाले आहे. बारामतीतील बहुप्रतीक्षित प्रेरणास्थळाच्या उद्घाटनासाठी आखण्यात आलेला मोदींचा प्रस्तावित दौरा तूर्तास रद्द करण्यात आला आहे. आता या वास्तूचे उद्घाटन पंतप्रधानांच्या हस्ते नव्हे, तर खासदार शरद पवार यांच्या हस्ते होणार आहे. येत्या १२ डिसेंबरला हा कार्यक्रम पार पडणार असल्याची माहिती स्वतः शरद पवार यांनी दिली. मात्र, मोदींचा दौरा नेमका कोणत्या कारणामुळे रद्द झाला, याचे गूढ अद्याप कायम आहे.
तीन तारखांची चर्चा, पण मोदींचा बारामती दौरा झाला नाही!

बारामतीतील विद्या प्रतिष्ठानच्या नक्षत्र उद्यान परिसरात हे प्रेरणास्थळ उभारण्यात आले आहे. महापुरुषांचे विचार, त्यांचे कार्य आणि सामाजिक योगदान नव्या पिढीपर्यंत पोहोचवण्याच्या उद्देशाने हा प्रकल्प साकारण्यात आला आहे. या वास्तूच्या उद्घाटनासाठी पंतप्रधान नरेंद्र मोदी यांना निमंत्रित करण्याचे नियोजन होते. त्यामुळे मोदींच्या बारामती दौऱ्याकडे राजकीय वर्तुळाचे लक्ष लागले होते.

सुरुवातीला ३ नोव्हेंबर रोजी उद्घाटन होण्याची चर्चा होती. मात्र, हा कार्यक्रम पुढे ढकलण्यात आला. त्यानंतर १६ नोव्हेंबरला मोदी बारामतीत येण्याची शक्यता व्यक्त झाली; परंतु त्यादिवशीही दौरा प्रत्यक्षात झाला नाही. आता अखेर हा प्रस्तावित दौरा रद्द झाल्याचे समोर आले असून, उद्घाटनाची जबाबदारी शरद पवारांकडे देण्यात आली आहे.

मोदींना निमंत्रण दिल्याने शरद पवारांवर झाली होती टीका
या संपूर्ण घडामोडींना राजकीय पार्श्वभूमीही आहे. देशभरात मतदारयादीच्या विशेष सखोल पुनरीक्षणाच्या मुद्द्यावरून इंडिया आघाडीकडून केंद्र सरकारविरोधात आंदोलन सुरू होते. अशा परिस्थितीत इंडिया आघाडीचा घटक असलेल्या शरद पवारांनी मोदींना बारामतीतील कार्यक्रमासाठी निमंत्रित केल्याने विरोधकांकडून प्रश्न उपस्थित करण्यात आले होते. सरकारविरोधात आंदोलन सुरू असताना पंतप्रधानांना बारामतीत बोलावण्यामागे नेमकी भूमिका काय, अशी टीका झाली होती.
मात्र, आता मोदींचा दौरा रद्द झाल्याने या चर्चांना वेगळे वळण मिळाले आहे. विशेष म्हणजे दौरा रद्द करण्यामागचे नेमके कारण अद्याप स्पष्ट झालेले नाही. त्यामुळे या निर्णयामागे काय घडामोडी घडल्या, याबाबत उत्सुकता कायम आहे.
पवार कुटुंबाची विद्या प्रतिष्ठानमध्ये बैठक; कोण उपस्थित होते?
दरम्यान, शुक्रवारी सकाळी शरद पवार यांनी बारामतीतील विद्या प्रतिष्ठानला भेट दिली. यावेळी खासदार सुप्रिया सुळे, जय पवार आणि युगेंद्र पवार यांच्यासह संस्थेच्या कामकाजाचा आढावा घेण्यात आला. या बैठकीत संस्थेच्या अनुषंगाने चर्चा झाली.
सध्या मतदारसंघ पुनर्रचना आणि राष्ट्रवादी काँग्रेसच्या संभाव्य विलीनीकरणाच्या चर्चांमुळे राज्यातील राजकीय वातावरण तापलेले आहे. अशा वेळी पवार कुटुंबातील महत्त्वाचे सदस्य एकत्र आल्याने या बैठकीकडेही राजकीय दृष्टिकोनातून पाहिले जात आहे. मात्र, बैठकीत राजकीय चर्चा झाल्याची अधिकृत माहिती समोर आलेली नाही.
विशेष म्हणजे, मागील महिन्यात जय पवार यांची विद्या प्रतिष्ठानच्या सदस्यपदी निवड झाली होती. त्यामुळे संस्थेच्या कामकाजाच्या दृष्टीनेही या बैठकीला महत्त्व आहे.
एकीकडे मोदींच्या दौऱ्याला स्थगिती, दुसरीकडे शरद पवारांच्या हस्ते १२ डिसेंबरला उद्घाटनाची घोषणा आणि त्याचवेळी पवार कुटुंबाची महत्त्वाची बैठक, अशा घडामोडींमुळे बारामतीतील या कार्यक्रमाकडे आता सर्वांचे लक्ष लागले आहे.
