दहशतवाद्यांना पैसे पुरवणाऱ्यांविरोधात ईडी ॲक्शन; श्रीनगरमध्ये चार ठिकाणी छापे, काय आहे प्रकरण?
श्रीनगर : दहशतवादी संघटनांना आर्थिक मदत पुरवणाऱ्यांविरोधात अंमलबजावणी संचालनालयाने (ईडी) मोठी कारवाई केली आहे. जम्मू-काश्मीरमधील दहशतवादी वित्तपुरवठ्याशी संबंधित मनी लाँड्रिंग प्रकरणात ईडीने श्रीनगरमधील चार ठिकाणी छापे टाकले आहेत.
बंदी घातलेल्या लष्कर-ए-तय्यबा या दहशतवादी संघटनेशी कथित संबंध असलेल्या उमर आदिल डार आणि त्याच्या साथीदारांशी संबंधित ठिकाणी ही शोधमोहीम राबवण्यात आली. या कारवाईमुळे काश्मीरमधील दहशतवादी आर्थिक नेटवर्क पुन्हा एकदा तपास यंत्रणांच्या रडारवर आले आहे.
नेमकं काय आहे प्रकरण?
मिळालेल्या माहितीनुसार, ईडीने ३ नोव्हेंबर रोजी मनी लाँड्रिंग प्रतिबंधक कायद्यांतर्गत (PMLA) श्रीनगरमधील चार ठिकाणी शोधमोहीम राबवली. उमर आदिल डार हा लष्कर-ए-तय्यबाचा ओव्हर ग्राउंड वर्कर (OGW) म्हणून काम करत असल्याचा तपास यंत्रणांना संशय आहे. त्याचे या प्रतिबंधित संघटनेशी संबंधित कारवायांमध्ये सहभागी असल्याचे आरोप आहेत.
तपास यंत्रणांच्या माहितीनुसार, यापूर्वी उमर आदिल डार आणि त्याच्या साथीदारांना मोठ्या प्रमाणात रोख रक्कम आणि प्रतिबंधित संघटनेशी संबंधित आक्षेपार्ह साहित्य बाळगल्याप्रकरणी पकडण्यात आले होते. जम्मू-काश्मीरमधील फुटीरतावादी आणि भारतविरोधी कारवायांमधील कथित सहभागाच्या प्रकरणात तो सुमारे चार वर्षे तुरुंगातही होता.
आर्थिक व्यवहारांचे नेटवर्क तपासाच्या कक्षेत
या छापेमारीमागे दहशतवादी कारवायांसाठी वापरल्या जाणाऱ्या आर्थिक स्रोतांचा शोध घेणे हा मुख्य उद्देश आहे. संशयित आर्थिक व्यवहार, निधी पुरवठ्याचे मार्ग आणि सीमेपलीकडे असलेल्या सूत्रांशी संभाव्य संबंध यांची माहिती तपास यंत्रणा गोळा करत आहेत. या माध्यमातून दहशतवादी संघटनांना आर्थिक मदत कशी पोहोचवली जात होती, याचा शोध घेण्याचा प्रयत्न केला जात आहे.
दरम्यान, या प्रकरणातील तपास सुरू असून छापेमारीतून मिळालेल्या माहितीच्या आधारे पुढील कारवाई होण्याची शक्यता आहे. दहशतवादी संघटनांच्या आर्थिक नेटवर्कवर नियंत्रण मिळवण्यासाठी तपास यंत्रणांकडून प्रयत्न सुरू आहेत.
