बीडचा पालकमंत्री ठरला!! देशमुख हत्या प्रकरणामुळे धनंजय मुंडे यांचा पत्ता अखेर कट, कोणाच नाव झालं फायनल?
बीड : राज्यात महायुतीला स्पष्ट बहुमत मिळालं आहे. त्यानंतर पाच डिसेंबरला नव्या मंत्रिमंडळाचा शपथविधी झाला. मंत्रिमंडळाच्या शपथविधीनंतर अधिवेशनाच्या एक दिवस आधी महायुतीच्या मंत्रिमंडळाचा विस्तार झाला आणि अधिवेशनाच्या शेवटच्या दिवशी मंत्र्यांना खात्याचं वाटप देखील करण्यात आले.
दरम्यान खाते वाटपानंतर आता सर्व राज्याचं लक्ष लागलं आहे ते म्हणजे पालकमंत्रिपदाच्या वाटपाकडे, महायुतीमध्ये अनेक जागांवर पालकमंत्रिपदावरून रस्सीखेच असल्याचं दिसून येत आहे.
तसेच बीडच्या पालकमंत्री कोण असणार, याची चर्चा मागील अनेक दिवसांपासून सुरू होती. मस्साजोगचे सरपंच संतोष देशमुख यांचे हत्या प्रकरण समोर आल्यानंतर धनंजय मुंडे यांच्यावर आरोप होऊ लागले. त्यामुळे धनंजय मुंडे यांना पालकमंत्री पद देण्यात येऊ नये अशी मागणी करण्यात येत होती.
सूत्रांनी दिलेल्या माहितीनुसार, बीडचा पालकमंत्री ठरला असून धनंजय मुंडे यांचा पत्ता कट झाला आहे. मुख्यमंत्री देवेंद्र फडणवीस आणि उपमुख्यमंत्री अजित पवार यांच्यात झालेल्या चर्चेनंतर बीडच्या पालकमंत्री पदाबाबत निर्णय घेण्यात आला आहे.
देवेंद्र फडणवीस असणार बीडचे पालकमंत्री?
पालकमंत्री पदावरून धनंजय मुंडे यांचा पत्ता कट झाला असून चुलत भगिनी आणि राज्याच्या मंत्री पंकजा मुंडे यांनादेखील संधी नाकारण्यात आल्याची माहिती आहे. धनजंय मुंडे यांना बीडचे पालकमंत्री पद देण्यात येऊ नये अशी मागणी करण्यात येत होती.
बीडच्या पालकमंत्री पदाची जबाबदारी मुख्यमंत्री देवेंद्र फडणवीस यांनी घ्यावी अशी मागणी करण्यात येत होती. मात्र, बीडच्या पालकमंत्रीपदाचा निर्णय मुख्यमंत्री देवेंद्र फडणवीस आणि उपमुख्यमंत्री अजित पवार यांनी चर्चा करून घेतला.
