दावोसच्या वर्ल्ड इकॉनॉमिक फोरम मध्ये बारामतीच्या पवार कुटूंबातील देवयानी पवार करणार भारताचे प्रतिनिधित्व, ६०० अर्जदारांमधून निवड..
बारामती : स्वित्झर्लंडमधील दावोस येथे २० ते २४ जानेवारी दरम्यान होणाऱ्या वर्ल्ड इकॉनॉमिक फोरमच्या (डब्ल्यूईएफ) वार्षिक बैठकीत बारामतीच्या तरुण उद्योजिका देवयानी पवार यांची निवड झाली आहे.
स्वित्झर्लंडमधील दावोस येथे होणा-या वर्ल्ड इक़ॉनॉमिक फोरमच्या (डब्ल्यूईएफ) वार्षिक बैठकीत युवा उद्योजिका व ग्लोबल शेपर्स कम्युनिटीच्या बारामती हबच्या सदस्या देवयानी रणजित पवार उपस्थित राहणार आहेत.
ग्लोबल शेपर्स कम्युनिटीच्या जगभरातील पन्नास प्रतिनिधींना या बैठकीस उपस्थित राहण्याची संधी मिळाली आहे, त्यात देवयानी पवार यांचा समावेश आहे. भारतातून दोनच जणांना या बैठकीस उपस्थित राहता येणार असून त्यात देवयानी यांचा समावेश आहे.
ग्लोबल शेपर्स कम्यूनिटीच्या जगभरातील ५० प्रतिनिधींच्या शिष्टमंडळासाठी निवडलेल्या २ भारतीयांमध्ये देवयानी पवार यांचा समावेश आहे. ग्लोबल शेपर्स कम्युनिटी हा वर्ल्ड इकॉनॉमिक फोरमचा एक उपक्रम असून या अंतर्गत जगभरातील युवक हे आपापल्या भागातील स्थानिक, प्रादेशिक यांबरोबरच जागतिक आव्हानांना तोंड देण्यासाठी एकत्रितपणे काम करतात.
जगभरात ग्लोबल शेपर्स कम्यूनिटीचे ५०० हुन अधिक स्थानिक सक्रीय विभाग आहेत. बारामती विभागात सातत्याने सामाजिक,नैसर्गिक व हवामान बदल, आरोग्यसेवांविषयक जागरूकता, पुनर्वापर आदी विषयातील सातत्यपूर्ण व उत्कृष्ट कामासाठी कार्यरत असेलेल्या देवयानी पवार यांची जगभरातील ६०० अर्जदारांमधून या परिषदेसाठी निवड करण्यात आली आहे.
देवयानी यांनी हाती घेतलेल्या प्रकल्पांमध्ये बारामतीजवळील जंगलामध्ये वनविभागाच्या मदतीने ४ हजारहन अधिक देशी वृक्षांची लागवड करणे, बारामती विभागाच्या आजूबाजूच्या गावांमध्ये महिला व मुलींना सॅनिटरी पॅडचे मोफत वाटप करणे, ५०० हून अधिक ग्रामीण महिलांमध्ये मासिक पाळीदरम्यान आवश्यक स्वच्छतेबाबत जनजागृती मोहीम राबविणे, ग्रामीण पार्श्वभूमीच्या ४ हजारांहून अधिक तरुणांना कौशल्याधारीत प्रशिक्षण देणे, याबरोबरच कौशल्य विकास, कचरा व्यवस्थापन, रक्तदान मोहीम, मानसिक आरोग्यबद्दल जनजागृती, वृद्ध नागरीकांसाठी आरोग्य सेवा पुरविणे अशा उपक्रमांचा समावेश आहे.
या निवडीबाबत बोलताना देवयानी पवार म्हणाल्या, वर्ल्ड इकॉनॉमिक फोरमसारख्या प्रतिष्ठित व्यासपीठावर भारताचे प्रतिनिधित्व करण्याची मिळालेली संधी ही मी माझा सन्मान समजते. दावोसच्या या भेटीमध्ये मला जागतिक नेत्यांसोबतच सकारात्मक काम करीत समाजात बदल घडविणाऱ्या अनेकांना भेटण्याची आणि त्यांसोबत नेटवर्किंग करण्याची संधी मिळेल. याबरोबरच या परिषदे दरम्यान वर्ल्ड इकॉनॉमिक फोरमचे संस्थापक असलेले क्लॉस श्वाब यांसोबत होणाऱ्या एका विशेष सत्रासाठी देखील मी उत्सुक असल्याचे त्यांनी सांगितले.
