मोठी बातमी! ओमराजे निंबाळकर यांच्याबाबत पोलिसांचा मोठा निर्णय; 8 दिवस राहणार कडेकोट बंदोबस्त, नेमकं कारण काय?
धाराशिव : शिवसेना ठाकरे गटातून शिंदे गटात प्रवेश केलेल्या खासदार ओमराजे निंबाळकर यांच्या निवासस्थानी सुरक्षा वाढवण्यात आली असून पुढील आठवडाभर अतिरिक्त पोलीस बंदोबस्त कायम ठेवण्याचा निर्णय प्रशासनाने घेतला आहे. शिवसेनेतील राजकीय घडामोडी आणि वाढलेला तणाव लक्षात घेऊन हा निर्णय घेण्यात आल्याची माहिती समोर आली आहे.
शिवसेना ठाकरे गटातील सहा खासदारांनी पक्षाला धक्का देत शिंदे गटाची वाट धरली. या राजकीय घडामोडीनंतर राज्याच्या राजकारणात मोठी खळबळ उडाली आहे. ओमराजे निंबाळकर यांनीही शिंदे गटात प्रवेश केला असला तरी ते आपल्या मतदारसंघातच थांबले होते.
दरम्यान, पवनराजे निंबाळकर हत्याकांड प्रकरणाचा निकाल लागल्यानंतर मुंबईत तणावपूर्ण वातावरण निर्माण झाले होते. यावेळी ओमराजे निंबाळकर कुटुंबीयांसह न्यायालयात उपस्थित होते. न्यायालयाबाहेर ठाकरे गटाचे शिवसैनिक मोठ्या संख्येने जमल्याने काही काळ तणाव निर्माण झाला होता. त्यानंतर ते धाराशिवला परतल्यानंतरही त्यांच्या निवासस्थानाबाहेर काही शिवसैनिक जमा झाल्याचे सांगितले जाते.
या पार्श्वभूमीवर पोलिसांनी सुरक्षा वाढवण्याचा निर्णय घेतला आहे. पोलिस आयुक्त अमितेश कुमार यांनी बंदोबस्त वाढवण्याच्या सूचना दिल्या असून दिवसा एक अधिकारी आणि पाच पोलीस कर्मचारी तैनात राहणार आहेत. परिस्थितीचा आढावा घेऊन पुढील आठवडाभर ही सुरक्षा व्यवस्था कायम ठेवण्यात येणार आहे.
दरम्यान, सहा खासदारांच्या पक्षांतरानंतर शिवसेना पक्षप्रमुख उद्धव ठाकरे यांनी संबंधित मतदारसंघांमध्ये दौरे करण्याचा निर्णय घेतला आहे. त्यानुसार 26 तारखेला उद्धव ठाकरे धाराशिव दौऱ्यावर येणार आहेत. या दौऱ्याकडे राज्याचे लक्ष लागले आहे.
दुसरीकडे, ओमराजे निंबाळकर यांनी शिंदे गटात प्रवेश केल्यानंतर जिल्ह्यात पक्षसंघटना मजबूत करण्यासाठी प्रयत्न सुरू केले आहेत. तसेच पक्षांतराच्या निर्णयाबाबत आपल्या भावना त्यांनी सोशल मीडियाच्या माध्यमातून कार्यकर्त्यांसमोर व्यक्त केल्या आहेत.
