दुष्काळाच्या छायेत मोठी बातमी! परतीच्या पावसाचा जोर वाढणार; ‘या’ जिल्ह्यांना अलर्ट…

मुंबई : महाराष्ट्रात सप्टेंबर महिन्याच्या अखेरीसही पावसाची प्रतीक्षा कायम आहे. राज्यातील अनेक भागांत अद्याप अपेक्षित पाऊस झालेला नसल्याने शेतकऱ्यांची चिंता वाढली आहे. काही जिल्ह्यांत हलक्या ते मध्यम स्वरूपाच्या सरी कोसळत असल्या, तरी जोरदार पावसाचा अभाव कायम आहे.

दरम्यान, राज्यातील २६५ तालुक्यांमध्ये ट्रिगर-१ अंतर्गत दुष्काळाची नोंद करण्यात आली आहे. अशा परिस्थितीत आज, २८ सप्टेंबर रोजी राज्यातील कोकण, पश्चिम महाराष्ट्र, मराठवाडा आणि विदर्भात पावसाची स्थिती कशी राहणार, याकडे सर्वांचे लक्ष लागले आहे.

कोकणात हलक्या पावसाची शक्यता

कोकण विभागात आज बहुतांश ठिकाणी ढगाळ वातावरण राहण्याचा अंदाज आहे. मुंबई, ठाणे, रायगड, रत्नागिरी आणि सिंधुदुर्ग जिल्ह्यांतील काही भागांत हलक्या ते मध्यम स्वरूपाच्या पावसाच्या सरी कोसळण्याची शक्यता आहे. मात्र, आज कोकणातील कोणत्याही जिल्ह्याला पावसाचा इशारा देण्यात आलेला नाही. दरम्यान, २९ सप्टेंबर रोजी रायगड आणि रत्नागिरी जिल्ह्यांसाठी यलो अलर्ट देण्यात आला आहे.

पश्चिम महाराष्ट्रात मेघगर्जनेसह पावसाचा अंदाज

पश्चिम महाराष्ट्रातील पुणे, सातारा, सांगली आणि कोल्हापूर जिल्ह्यांत काही ठिकाणी पावसाची शक्यता आहे. विशेषतः पुणे, सातारा आणि कोल्हापूरच्या घाटमाथ्यावर यलो अलर्ट देण्यात आला आहे. या भागांत ताशी ३० ते ४० किलोमीटर वेगाने वारे वाहण्याची शक्यता असून, मेघगर्जनेसह हलका ते मध्यम पाऊस पडू शकतो. २९ सप्टेंबर रोजीदेखील पश्चिम महाराष्ट्रातील काही भागांत यलो अलर्ट कायम राहण्याचा अंदाज आहे.

उत्तर महाराष्ट्रात दमदार पावसाची प्रतीक्षा

उत्तर महाराष्ट्रातील धुळे, नंदुरबार, जळगाव आणि नाशिक जिल्ह्यांत काही ठिकाणी हलक्या ते मध्यम पावसाच्या सरी पडण्याची शक्यता आहे. मात्र, अनेक भागांत हवामान कोरडे राहण्याचा अंदाज आहे. त्यामुळे उत्तर महाराष्ट्रातील शेतकऱ्यांना दमदार पावसासाठी आणखी प्रतीक्षा करावी लागू शकते. नाशिकच्या घाटमाथ्यावर २९ सप्टेंबर रोजी पावसाचा यलो अलर्ट देण्यात आला आहे.

मराठवाड्यात काही जिल्ह्यांत पावसाची शक्यता

मराठवाड्यातील बहुतांश भागांत पावसाचा जोर कमी राहण्याची शक्यता आहे. जालना, परभणी, हिंगोली आणि नांदेड जिल्ह्यांत प्रामुख्याने कोरडे हवामान राहण्याचा अंदाज आहे. तर लातूर आणि छत्रपती संभाजीनगर जिल्ह्यांत काही ठिकाणी मेघगर्जनेसह हलका पाऊस पडू शकतो. बीड आणि धाराशिव जिल्ह्यांसाठी यलो अलर्ट देण्यात आला असून, या भागांत ताशी ३० ते ४० किलोमीटर वेगाने वारे वाहण्याची शक्यता आहे.

विदर्भात पावसाची उघडीप कायम राहणार

विदर्भातील बहुतांश जिल्ह्यांत पावसाची उघडीप कायम राहण्याची शक्यता आहे. काही भागांत ढगाळ वातावरण निर्माण होऊ शकते. मात्र, मोठ्या पावसाचा अंदाज नसल्याने शेतकऱ्यांची चिंता कायम आहे. पावसाची तूट आणि त्याचा खरीप पिकांवर होणारा संभाव्य परिणाम यामुळे विदर्भातील शेतकऱ्यांचे लक्ष आगामी हवामानाकडे लागले आहे.

पुढील तीन दिवसांत पावसाचा जोर वाढणार?

राज्यातील काही भागांत पावसासाठी अनुकूल वातावरण निर्माण होण्याची शक्यता असली, तरी सर्वत्र जोरदार पाऊस पडण्याचे संकेत नाहीत. घाटमाथ्यावरील काही जिल्ह्यांना यलो अलर्ट देण्यात आला आहे. तर इतर भागांत हलक्या सरी किंवा मेघगर्जनेसह पावसाची शक्यता आहे. त्यामुळे पुढील तीन दिवसांत राज्यातील पावसाची स्थिती कशी राहते, याकडे शेतकरी आणि नागरिकांचे लक्ष लागले आहे.