अजितदादांच्या लेकाचा आज साखरपुडा, खासदार सुप्रिया सुळे सहकुटुंब हजेरी लावणार..
पुणे : राज्याचे उपमुख्यमंत्री अजित पवार यांचे चिरंजीव जय पवार यांचा आज साखरपुडा पार पडत आहे. पुण्यात आज सायंकाळी मित्र, कुटुंबातील सदस्य आणि पक्षातील मोजक्या नेत्यांच्या उपस्थितीत हा सोहळा पार पडणार आहे. सोशल मीडिया कंपनी सांभाळणारे प्रवीण पाटील यांची मुलगी ऋतुजा पाटील हिच्यासोबत जय पवार लवकरच विवाहबंधनात अडकणार आहेत.
यामुळे या कार्यक्रमाची चर्चा सुरु आहे. जय पवार यांच्या होणाऱ्या पत्नी पवार कुटुबांच्या भावी सूनबाई ऋतुजा पाटील या सोशल मीडिया कंपनी सांभाळणारे साताऱ्यातील फलटणचे प्रविण पाटील यांच्या कन्या आहेत. ऋतुजा पाटील या उच्चशिक्षित आहेत. काही दिवसांपूर्वी जय पवार आणि ऋतुजा पाटील यांनी शरद पवारांची भेट घेऊन त्यांचा आशीर्वाद घेतला होता.
याबाबत खासदार सुप्रिया सुळे यांनी सोशल मीडियावर एक पोस्ट देखील शेअर केली होती. त्यामुळे सर्वाचं लक्ष वेधलं गेलं. यामध्ये त्यांनी जय पवार यांचे अभिनंदन केले आहे. सुप्रिया सुळे यांनी शेअर केलेल्या फोटोत शरद पवार, त्यांच्या पत्नी प्रतिभा पवार, सुप्रिया सुळे यांच्यासह जय पवार हे दिसत होते.
आज जय पवार यांच्या आत्या सुप्रिया सुळे या संपूर्ण कुटुंबासह या सोहळ्याला उपस्थित राहणार आहेत. बारामतीमध्ये बोलताना त्यांनी प्रतिक्रिया दिली आहे. ‘मला सुनेत्रा वहिनींचा फोन आला होता. मला आमंत्रण दिलं आहे. अर्थातच आमंत्रण दिल्यावर जाणारच. सदानंद सुळे, सुप्रिया सुळे आणि रेवती सुळे जाणार आहेत.
तसेच बाकीच्याचं मला माहीत नाही’, असं म्हणत त्यांनी शरद पवार जाणार की नाही याबाबतीत कोणतीही अधिकृत माहिती दिली नाही. त्यासोबतच पक्षातील काही प्रमुख नेते सुद्धा जय पवार यांच्या साखरपुड्याला हजेरी लावणार आहेत. पवार कुटुंबात आलेल्या वादळानंतर आता घरात होत असलेल्या मंगल कार्यालयामुळे संपूर्ण पवार कुटुंब पुन्हा एकदा एकत्र येणार आहे.
