मध्य रेल्वेवर अपघात; लोकलचा डबा रुळावरून घसरला, वाहतूक विस्कळीत…
मुंबई : मध्य रेल्वे मार्गावर आज सकाळी गर्दीच्या वेळी मोठा अपघात घडला. डोंबिवली स्थानकाजवळ एका लोकलचा डबा रुळावरून घसरल्याने वाहतुकीचा मोठा खोळंबा निर्माण झाला आहे.
कळवा कारशेडमधून कल्याणकडे जाणारी रिकामी लोकल या अपघाताला बळी पडली. या घटनेमुळे मुंबईकडे जाणाऱ्या ‘अप’ मार्गावरील वाहतूक पूर्णपणे विस्कळीत झाली असून, सकाळच्या वेळेत प्रवास करणाऱ्या नोकरदार वर्गाला मोठा त्रास सहन करावा लागत आहे.
आज सकाळी सुमारे ८ वाजण्याच्या सुमारास, कळवा कारशेडमधून कल्याणच्या दिशेने जाणारी एक रिकामी लोकल गाडी डोंबिवली आणि ठाकुर्ली स्थानकांदरम्यान रुळावरून घसरली. या घटनेत गाडीचा एक डबा रुळावरून खाली उतरल्याची माहिती समोर आली आहे.
सुदैवाने, गाडीत एकही प्रवासी नसल्यामुळे कोणतीही जीवितहानी झाली नाही. मात्र, या अपघाताचा परिणाम मध्य रेल्वे च्या मुख्य मार्गावरील वाहतुकीवर झाला असून, संपूर्ण वेळापत्रक विस्कळीत झाले आहे. यात्रेकरूंना त्यामुळे मोठ्या गैरसोयीचा सामना करावा लागत आहे.
या अपघाताचा थेट परिणाम मुंबईकडे जाणाऱ्या रेल्वे वाहतुकीवर झाला असून, किमान तीन गाड्या विविध ठिकाणी थांबून राहिल्या आहेत. सकाळच्या गर्दीच्या वेळी ही घटना घडल्याने कल्याण, डोंबिवली आणि ठाकुर्ली या स्थानकांवर प्रवाशांची प्रचंड गर्दी उसळली आहे.
अनेक गाड्या १५ ते २० मिनिटांच्या उशिराने धावत असून, काही फेऱ्या रद्द होण्याचीही शक्यता व्यक्त केली जात आहे. मध्य रेल्वे मार्गावरील विस्कळीत झालेल्या सेवेमुळे प्रवाशांचा संताप वाढला आहे. दरम्यान, अडकून पडलेले अनेक प्रवासी वैतागून रेल्वे रुळांवरून चालत आपल्या गंतव्यस्थानी जाताना दिसत आहेत, ज्यामुळे सुरक्षिततेचा प्रश्नही निर्माण झाला आहे.
दरम्यान, घटनेची माहिती मिळताच रेल्वेचे वरिष्ठ अधिकारी आणि तांत्रिक पथक तातडीने घटनास्थळी दाखल झाले आहेत. घसरलेला डबा पुन्हा रुळावर आणण्याचे काम युद्धपातळीवर सुरू आहे. मध्य रेल्वे प्रशासनाने दिलेल्या माहितीनुसार, दुपारपर्यंत वाहतूक पूर्ववत करण्याचे प्रयत्न सुरू आहेत. तोपर्यंत प्रवाशांनी धीर धरण्याचे आवाहन करण्यात आले आहे.
