मुंबईतून भाचा पुण्याला मामाकडे आला, किरकोळ वादातून मामाने भाच्याच्या छातीत चाकू भोसकून केला खून, घटनेने खळबळ..
पुणे : दिवसागणिक पुण्यातली गुन्हेगारी वाढते आहे असं म्हटलं तरी हरकत नाही. कोयता घेऊन रस्त्याने फिरणे, टोळा धाडी, गाड्या जाळणे एवढंच नाही तर शुल्लक रकमेसाठी हात तोडण्यासारख्या अंगावर काटा आणणारे प्रकार सध्या पुण्यात वेगात वाढले आहेत.
किरकोळ कारणावरून, वादातून मामाने भाच्याच्या छातीत चाकू भोकसून त्याची हत्या केल्याचा धक्कादायक प्रकार समोर आला आहे. या घटनेने एकच खळबळ उडाली आहे. पोलिसांनी या घटनेत आरोपी मामाला तात्काळ अटक केली आहे. पुण्यातील नऱ्हे आंबेगाव परिसरातून घटना उघडकीस आली आहे.
गजानन गजकोश (वय. १५, रा. धारावी कोळीवाड्याजवळ, मुंबई) असे मृत भाच्याचे नाव आहे. तर मेघनाथ अशोक तपासे (वय. ४१, रा. फ्लॅट नं. १०१, कृष्णाईनगरी, मानाजीनगर, नऱ्हे) असे आरोपी मामाचे नाव आहे.
कृष्णाईनगर या भागात ही घटना शुक्रवारी रात्रीच्या सुमारास घडली आहे. मंगेश दत्तात्रय ओव्हाळ यांनी सिंहगड रोड पोलीस ठाण्यात या हत्येप्रकरणी फिर्याद दिली आहे. याबाबत पोलिसांकडून मिळालेल्या माहितीनुसार, मुंबईहून गजानन गजकोश हा १५ वर्षीय मुलगा पुण्यातील आपल्या मामामाकडे राहायला आला होता.
मात्र शुक्रवारी रात्री मामाचे भाच्यासोबत किरकोळ भांडण झाले. या भांडणानंतर चिडलेल्या मामा मेघनाथ तपासे याने गजाननला पट्ट्याने मारहाण केली. त्यानंतरही मामाचा राग शांत झाला नाही. त्याने थेट घरातील चाकूने १५ वर्षीय गजाननच्या छातीत डाव्या बाजूस वार केले. त्यात गजानन गंभीर जखमी झाला. धारदार चाकूच्या हल्ल्यात भाचाचा मृत्यू झाला.
दरम्यान, घटनेची माहिती मिळाल्यानंतर पोलिसांनी आरोपी मामाला तात्काळ अटक केली आहे. याप्रकरणी सिंहगड रोड पोलीस ठाण्यात गुन्हा दाखल करण्यात आला आहे. पुढील तपास सिंहगड रोड पोलीस करत आहेत.
