निदा खानला आश्रय दिल्याचा आरोप, ऑडिओ क्लिपचीही चर्चा; इम्तियाज जलील कोर्टात पोहोचताच मोठा निर्णय, ५० हजारांच्या जातमुचलक्यावर जामीन!

नाशिक : नाशिकमधील बहुचर्चित टीसीएस प्रकरणात एमआयएम नेते आणि माजी खासदार इम्तियाज जलील यांना न्यायालयाने मोठा दिलासा दिला आहे. या प्रकरणातील आरोपी निदा एजाज खान पसार असताना तिला आश्रय मिळवून देण्यासाठी मदत केल्याचा आरोप जलील यांच्यावर आहे. याच प्रकरणात नाशिक न्यायालयाने त्यांना ५० हजार रुपयांच्या जातमुचलक्यावर जामीन मंजूर केला. न्यायालयाचे समन्स मिळाल्यानंतर जलील गुरुवारी, १९ नोव्हेंबर रोजी न्यायालयात हजर झाले होते. न्यायमूर्ती खारकर यांच्यासमोर त्यांच्या जामीन अर्जावर सुनावणी झाली. त्यानंतर न्यायालयाने त्यांना जामीन मंजूर केला.
निदा खानला मदत केल्याचा आरोप कसा आला?


निदा खान पसार असताना तिला छत्रपती संभाजीनगरमध्ये आश्रय मिळवून देण्यात आल्याचा तपास यंत्रणांचा दावा आहे. एमआयएमचे नगरसेवक मतीन पटेल यांनी जलील यांच्या सांगण्यावरून निदाला राहण्याची व्यवस्था केल्याचा आरोप करण्यात आला होता. मतीन पटेल यांच्या चौकशीतून जलील यांचे नाव समोर आल्याचे पोलिसांनी म्हटले होते. या प्रकरणातील कथित संवादाच्या ध्वनिमुद्रणाचीही चर्चा झाली होती. त्यामुळे जलील यांची भूमिका तपासाच्या कक्षेत आली. मात्र, जलील यांनी आपल्यावरील आरोप फेटाळले आहेत.

‘मी तिला फक्त कायदेशीर सल्ला देण्याची भूमिका घेतली’

जामीन मिळाल्यानंतर जलील यांनी माध्यमांशी बोलताना आपली बाजू स्पष्ट केली. एखाद्या आरोपीला कायदेशीर प्रक्रियेबाबत मदत करणे हा गुन्हा होऊ शकत नाही, असे ते म्हणाले. निदा खानला आपण भेटलो होतो. तिने आपली बाजू सांगितल्यानंतर तिचे म्हणणे खरे असल्यास आपण तिच्या पाठीशी उभे राहू, असे सांगितले होते, असा दावा त्यांनी केला.
मात्र, तिला वाचवण्यासाठी कोणतीही बेकायदेशीर मदत करणार नसून केवळ कायदेशीर सल्ला देऊ शकतो, असे आपण स्पष्ट केले होते, असेही जलील यांनी सांगितले. निदाची कौटुंबिक पार्श्वभूमी मजबूत नसल्याने तिला मार्गदर्शनाची गरज होती, असे त्यांचे म्हणणे आहे. एखाद्याला कायदेशीर सल्ला देणे गुन्हा असेल, तर सर्व वकिलांनाही तुरुंगात टाकावे लागेल, अशी टिप्पणी त्यांनी केली.
निदा खानच्या प्रकरणातही महत्त्वाच्या घडामोडी
दरम्यान, नाशिकमधील टीसीएस कार्यालयाशी संबंधित कथित लैंगिक छळ आणि धर्मांतराच्या प्रयत्नांच्या प्रकरणात निदा खानचे नाव चर्चेत आले होते. कंपनी आणि पोलिसांकडून तिच्याविरोधात कारवाई करण्यात आली. निदा सध्या गर्भवती असून तिलाही न्यायालयाने सशर्त जामीन मंजूर केला आहे. या प्रकरणानंतर तिच्या पतीने घटस्फोटाची मागणी केल्याची माहितीही समोर आली आहे.
इम्तियाज जलील यांना जामीन मिळाल्याने त्यांच्यावरील आरोप संपलेले नाहीत. जामीन हा न्यायालयीन प्रक्रियेतील दिलासा असून, प्रकरणाचा तपास आणि पुढील सुनावणी सुरू राहणार आहे. त्यामुळे निदा खानला आश्रय देण्याच्या आरोपांबाबत तपासात पुढे काय निष्पन्न होते आणि न्यायालयात कोणते मुद्दे समोर येतात, याकडे आता लक्ष लागले आहे.
