एसटी कर्मचाऱ्यांसाठी दिवाळीआधीच मोठी भेट! ८३ हजार कर्मचाऱ्यांच्या खात्यात १० हजार रुपये; महागाई भत्ताही वाढला, सरनाईकांची घोषणा

मुंबई : महाराष्ट्र राज्य मार्ग परिवहन महामंडळातील अधिकारी आणि कर्मचाऱ्यांसाठी दिवाळीच्या पार्श्वभूमीवर आनंदाची बातमी समोर आली आहे. एसटी महामंडळातील तब्बल ८३ हजार अधिकारी आणि कर्मचाऱ्यांना सणासुदीच्या काळात आर्थिक दिलासा देण्यासाठी परिवहन मंत्री तथा महामंडळाचे अध्यक्ष प्रताप सरनाईक यांनी महत्त्वाच्या घोषणा केल्या आहेत. प्रत्येक कर्मचाऱ्याला १० हजार रुपये सानुग्रह अनुदान, पात्र कर्मचाऱ्यांना १२ हजार ५०० रुपये सणासाठी आगाऊ रक्कम आणि महागाई भत्त्यात दोन टक्क्यांची वाढ देण्याचा निर्णय घेण्यात आला आहे. या घोषणेमुळे एसटी कर्मचाऱ्यांची दिवाळी अधिक आनंदात साजरी होण्याची शक्यता आहे.

१० हजार रुपये सानुग्रह अनुदान, पात्र कर्मचाऱ्यांना आगाऊ रक्कम

एसटी महामंडळातील विविध कर्मचारी संघटनांच्या प्रतिनिधींसोबत झालेल्या बैठकीत या निर्णयांची घोषणा करण्यात आली. त्यानुसार, महामंडळातील प्रत्येक कर्मचाऱ्याला १० हजार रुपये सानुग्रह अनुदान दिले जाणार आहे. याशिवाय पात्र कर्मचाऱ्यांना १२ हजार ५०० रुपये सणासाठी आगाऊ रक्कम मिळणार आहे. दिवाळीच्या खरेदीसाठी आणि सणाच्या खर्चासाठी या रकमेचा उपयोग होऊ शकतो.

महागाई भत्ता ५८ वरून ६० टक्के

कर्मचाऱ्यांसाठी आणखी एक महत्त्वाचा निर्णय घेण्यात आला आहे. सध्या ५८ टक्के असलेला महागाई भत्ता वाढवून ६० टक्के करण्याची घोषणा प्रताप सरनाईक यांनी केली. त्यामुळे कर्मचाऱ्यांच्या वेतनातही वाढीव महागाई भत्त्याचा लाभ मिळणार आहे. सानुग्रह अनुदान, सणासाठी आगाऊ रक्कम आणि महागाई भत्त्यातील वाढ अशा तीन महत्त्वाच्या निर्णयांमुळे कर्मचाऱ्यांना दिलासा मिळाला आहे.

महामंडळावर १६० कोटींचा आर्थिक भार

एसटी महामंडळ सध्या आर्थिक अडचणींचा सामना करत असतानाही कर्मचाऱ्यांचा दिवाळीचा आनंद हिरावून घेता येणार नाही, अशी भूमिका परिवहन मंत्री प्रताप सरनाईक यांनी मांडली. या निर्णयांमुळे महामंडळावर सुमारे १६० कोटी रुपयांचा आर्थिक भार पडणार आहे. मात्र, कर्मचाऱ्यांनी वर्षभर केलेल्या मेहनतीची दखल घेणे आवश्यक असल्याचे त्यांनी स्पष्ट केले.

एसटीचे अधिकारी आणि कर्मचारी अहोरात्र काम करून लाखो प्रवाशांना सुरक्षित प्रवासाची सुविधा देतात. त्यामुळे सणाच्या काळात त्यांना सानुग्रह अनुदान देणे ही केवळ मदत नसून त्यांच्या कष्टांचा योग्य सन्मान आणि हक्क असल्याचे सरनाईक म्हणाले. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या पाठबळामुळे हे निर्णय घेणे शक्य झाल्याचेही त्यांनी नमूद केले.

संप आणि आंदोलनाबाबत सरनाईकांचे कर्मचाऱ्यांना आवाहन

दरम्यान, कर्मचाऱ्यांनी आपल्या मागण्यांसाठी संप किंवा आंदोलनाचा मार्ग स्वीकारू नये, असे आवाहनही परिवहन मंत्र्यांनी केले. एसटी ही सर्वसामान्य प्रवाशांची जीवनवाहिनी असून आंदोलनामुळे प्रवाशांची गैरसोय होऊ नये, अशी अपेक्षा त्यांनी व्यक्त केली. कर्मचारी आणि प्रवासी हे महामंडळाचे दोन महत्त्वाचे घटक असल्याचे सांगत कर्मचाऱ्यांच्या प्रश्नांवर चर्चेच्या माध्यमातून तोडगा काढण्याची तयारी असल्याचे त्यांनी स्पष्ट केले.

कर्मचाऱ्यांचे हित जपण्याबरोबरच प्रवाशांना दर्जेदार सेवा देणे आणि एसटी महामंडळाला आर्थिकदृष्ट्या सक्षम करणे, ही दोन्ही उद्दिष्टे असल्याचे सरनाईक यांनी सांगितले. कर्मचाऱ्यांच्या हिताशी संबंधित आणखी काही निर्णय दिवाळीनंतर घेतले जाणार असल्याची माहितीही त्यांनी दिली. त्यामुळे दिवाळीच्या घोषणेनंतर आता महामंडळाकडून पुढे कोणते निर्णय घेतले जातात, याकडे कर्मचाऱ्यांचे लक्ष लागले आहे.