बटाईने शेती करणाऱ्यांसाठी मोठी बातमी! आता जमीन मालकी नसतानाही मिळणार Farmer ID, नोंदणी कशी करायची?

मुंबई : देशातील कृषी क्षेत्रात डिजिटल व्यवस्था अधिक सक्षम करण्यासाठी केंद्र सरकारकडून महत्त्वाचे पाऊल उचलण्यात आले आहे. स्वतःच्या नावावर जमीन नसली, तरी दुसऱ्याची शेती करणाऱ्या बटाईदार आणि सालदार शेतकऱ्यांनाही आता अधिकृत शेतकरी ओळखपत्र म्हणजेच Farmer ID मिळण्याचा मार्ग मोकळा होणार आहे. त्यामुळे आतापर्यंत सरकारी योजनांच्या लाभापासून वंचित राहणाऱ्या या शेतकऱ्यांना दिलासा मिळण्याची शक्यता आहे.

ग्रामीण भागात अनेक शेतकरी दुसऱ्याची जमीन भाडेतत्त्वावर घेऊन शेती करतात. काही जण बटाईने, तर काही सालदार पद्धतीने वर्षभर शेतीची कामे करतात. मात्र, जमिनीची मालकी त्यांच्या नावावर नसल्याने अनेक सरकारी योजनांचा लाभ घेताना अडचणी येतात. सातबारा उताऱ्यावर नाव नसल्यामुळे पीक विमा, कृषी अनुदान, बँक कर्ज आणि इतर योजनांसाठी त्यांना पात्र ठरणे कठीण जाते.

आता अशा प्रत्यक्ष शेती करणाऱ्या शेतकऱ्यांचीही अधिकृत नोंदणी करण्याचा निर्णय घेण्यात आला आहे. यामुळे बटाईदार आणि सालदार शेतकऱ्यांची स्वतंत्र आकडेवारी सरकारकडे उपलब्ध होण्यास मदत होईल. तसेच त्यांच्यासाठी स्वतंत्र योजना आखणे आणि सरकारी मदत योग्य लाभार्थ्यांपर्यंत पोहोचवणे शक्य होऊ शकते.

Farmer ID म्हणजे काय?

शेतकऱ्यांची डिजिटल ओळख निर्माण करण्यासाठी Farmer ID ही व्यवस्था सुरू करण्यात आली आहे. हे शेतकऱ्याचे डिजिटल प्रोफाइल असून त्यामध्ये संबंधित शेतकऱ्याची वैयक्तिक माहिती, जमिनीचा तपशील, शेतीचे क्षेत्र आणि पिकांसंबंधी माहिती नोंदवली जाते.

सरकारी कृषी योजनांचा लाभ योग्य शेतकऱ्यांपर्यंत पोहोचावा आणि बनावट लाभार्थ्यांना आळा बसावा, हा या व्यवस्थेमागील प्रमुख उद्देश आहे. Farmer ID मुळे शेतकऱ्यांची माहिती डिजिटल स्वरूपात उपलब्ध राहण्यास मदत होते.

Farmer ID कसा तयार करायचा?

Farmer ID तयार करण्यासाठी AgriStack पोर्टलवर जाऊन नोंदणीची प्रक्रिया पूर्ण करावी लागते. त्यासाठी पुढील प्रक्रिया सांगितली आहे.
1. सर्वप्रथम AgriStack पोर्टलला भेट द्या.
2. ‘Create New User’ या पर्यायावर क्लिक करा.
3. आवश्यक माहिती भरून यूजर आयडी आणि पासवर्ड तयार करा.
4. अटी व शर्ती स्वीकारून फॉर्म सबमिट करा.
5. आधार कार्डशी लिंक असलेल्या मोबाइल क्रमांकावर आलेला OTP टाकून पडताळणी पूर्ण करा.
6. त्यानंतर आवश्यक माहितीसह नोंदणीची प्रक्रिया पूर्ण करा.

बटाईदार शेतकऱ्यांनी कोणती कागदपत्रे द्यायची?

बटाईदार आणि सालदार शेतकऱ्यांना Farmer ID साठी नोंदणी करताना जमीन मालकासोबत केलेला वैध करार आणि भाडेपट्टा किंवा लीजसंबंधित कागदपत्रे सादर करावी लागू शकतात. या कागदपत्रांमुळे संबंधित जमीन प्रत्यक्षात कोण कसत आहे, याची माहिती मिळण्यास मदत होईल.

अतिवृष्टी किंवा दुष्काळासारख्या नैसर्गिक आपत्तींच्या काळात शेती करणाऱ्या प्रत्यक्ष शेतकऱ्यांनाही मदत मिळावी, हा या निर्णयामागील महत्त्वाचा उद्देश असल्याचे सांगितले जात आहे. त्यामुळे जमीन मालकी नसलेल्या शेतकऱ्यांसाठी ही व्यवस्था महत्त्वाची ठरू शकते.