पहाटे ३ वाजता गच्चीवरून प्रवेश, बॅगेत हातोडा-दोरी अन् पाण्याची टाकीही छेडली; नीलम गोऱ्हेंच्या घरात घुसलेल्या तरुणाचा नेमका हेतू काय?
पुणे : विधान परिषदेच्या माजी उपसभापती डॉ. नीलम गोऱ्हे यांच्या पुण्यातील निवासस्थानी पहाटेच्या सुमारास झालेल्या घुसखोरीने खळबळ उडाली आहे. २६ सप्टेंबर रोजी पहाटे सुमारे ३ वाजता एका तरुणाने बंगल्याच्या गच्चीवरून प्रवेश केल्याची माहिती समोर आली आहे. सकाळी ६.१५ वाजण्याच्या सुमारास त्याची हालचाल लक्षात आल्यानंतर सुरक्षा रक्षक आणि कर्तव्यावर असलेल्या पोलिसांनी त्याला ताब्यात घेतले. विशेष म्हणजे, घटनेच्या वेळी डॉ. गोऱ्हे घरात उपस्थित नव्हत्या.
ताब्यात घेतलेल्या संशयिताच्या बॅगेची तपासणी केल्यानंतर पोलिसांना काही संशयास्पद वस्तू आढळल्या. त्यामध्ये हातोडा, पकड, हातमोजे आणि सुमारे १० मीटर लांबीची दोरी असल्याचे तक्रारीत नमूद करण्यात आले आहे. त्यामुळे तो केवळ बंगल्याच्या परिसरात भटकण्यासाठी आला होता की त्यामागे दुसरा काही उद्देश होता, याचा तपास आता महत्त्वाचा ठरला आहे.
या घटनेतील आणखी एक बाब पोलिसांच्या तपासाच्या केंद्रस्थानी आहे. बंगल्यात प्रवेश करण्यापूर्वी किंवा त्यादरम्यान घरातील पाण्याच्या टाकीचे कनेक्शन बंद करून ते तोडण्यात आल्याची माहिती समोर आली आहे. त्यामुळे संशयिताने घरात प्रवेश करण्यापूर्वी काही नियोजन केले होते का, याचाही तपास केला जात आहे.
ताब्यात घेतलेल्या तरुणाने आपण विद्यार्थी असल्याचे पोलिसांना सांगितल्याची माहिती आहे. मात्र, त्याच्याकडे वेगवेगळ्या नावांची ओळखपत्रे आढळल्याचे तक्रारीत नमूद करण्यात आले आहे. त्यामुळे त्याची खरी ओळख, तो कुठून आला, पुण्यात त्याचा मुक्काम कुठे होता आणि डॉ. गोऱ्हे यांच्या निवासस्थानी जाण्याचे कारण काय होते, याची चौकशी सुरू आहे.
या प्रकरणी शिवाजीनगर पोलीस ठाण्यात गुन्हा दाखल करण्यात आला आहे. संशयिताच्या हालचाली, बंगल्यात प्रवेश करण्याचा मार्ग आणि त्याच्याकडील साहित्य यांची माहिती पोलिस तपासत आहेत. तसेच या घटनेमागे चोरीचा उद्देश होता का, वैयक्तिक कारण होते का किंवा अन्य काही कारण होते, हे तपासातून स्पष्ट होणार आहे.
दरम्यान, संशयिताला सोडण्यासाठी काही राजकीय व्यक्तींकडून पोलिसांवर दबाव आणला जात असल्याचा दावा करण्यात आला आहे. मात्र, या दाव्याची अधिकृत पुष्टी झालेली नाही. त्यामुळे या आरोपांबाबतही पोलिसांकडून अधिकृत माहिती समोर येणे अपेक्षित आहे.
लोकप्रतिनिधीच्या निवासस्थानी पहाटेच्या वेळी अशा प्रकारे प्रवेश, त्यानंतर पाण्याचे कनेक्शन तोडणे आणि संशयास्पद साहित्य आढळणे यामुळे सुरक्षा व्यवस्थेवरही प्रश्न उपस्थित झाले आहेत. या संपूर्ण प्रकरणाचा तपास शिवाजीनगर पोलिसांकडून सुरू असून, तरुणाच्या चौकशीतून घुसखोरीमागील नेमका उद्देश समोर येण्याची शक्यता आहे.
