नांदेड हादरलं! माजी उपमुख्यमंत्री सुखबीर बादल यांच्यावर गुरुद्वाराबाहेर हल्ला; फडणवीसांनी घेतली तातडीची दखल
नांदेड : देशातील प्रमुख शीख नेत्यांपैकी एक आणि पंजाबचे माजी उपमुख्यमंत्री सुखबीर सिंह बादल यांच्यावर नांदेडमधील पवित्र तख्त श्री हजूर साहिब गुरुद्वारा परिसरात झालेल्या हल्ल्याने राजकीय आणि धार्मिक वर्तुळात खळबळ उडाली आहे. गुरुवारी दुपारी घडलेल्या या घटनेनंतर सुरक्षा व्यवस्थेवर गंभीर प्रश्नचिन्ह उपस्थित झाले असून महाराष्ट्र सरकारने तातडीने तपासाचे आदेश दिले आहेत.
माहितीनुसार, शिरोमणी अकाली दलाचे अध्यक्ष सुखबीर बादल हे पत्नी आणि खासदार हरसिमरत कौर बादल यांच्यासह धार्मिक दर्शनासाठी नांदेडमध्ये आले होते. गुरुद्वारा परिसरातून बाहेर पडत असताना अचानक एका व्यक्तीने त्यांच्याजवळ जाण्याचा प्रयत्न करत हल्ला केल्याची माहिती समोर आली. सुरक्षा कर्मचाऱ्यांनी प्रसंगावधान राखत हल्लेखोराला रोखले आणि बादल यांना तातडीने सुरक्षित ठिकाणी हलवण्यात आले.
घटनेनंतरचा एक व्हिडिओ सोशल मीडियावर व्हायरल झाला आहे. त्यात सुखबीर बादल यांना काही जणांच्या मदतीने इमारतीत नेताना दिसत असून त्यांच्या हाताला पट्टी बांधलेली असल्याचेही दिसून येते. त्यामुळे त्यांना किरकोळ दुखापत झाल्याची माहिती समोर आली आहे. खबरदारीचा उपाय म्हणून त्यांना खासगी रुग्णालयात दाखल करण्यात आले. सध्या त्यांची प्रकृती स्थिर असल्याचे सांगण्यात आले आहे.
या घटनेची माहिती मिळताच मुख्यमंत्री देवेंद्र फडणवीस यांनी नांदेड पोलीस अधीक्षकांकडून तातडीने अहवाल मागवला. तसेच त्यांनी स्वतः सुखबीर बादल यांच्याशी दूरध्वनीवर संपर्क साधून प्रकृतीची विचारपूस केली. हल्ल्यामागील कारणांचा सखोल तपास करून दोषींवर कठोर कारवाई करण्याचे निर्देशही त्यांनी दिले आहेत.
पोलिसांनी वेगाने हालचाल करत काही तासांतच आरोपीला अटक केली. प्राथमिक चौकशीत हल्ल्याचा हेतू स्पष्ट झालेला नसला तरी आरोपीची पार्श्वभूमी, त्याचे संपर्क आणि हल्ल्यापूर्वीच्या हालचालींची माहिती गोळा केली जात आहे. या प्रकरणात आणखी कोणाचा सहभाग आहे का, याचाही तपास सुरू आहे.
राज्याचे गृहराज्यमंत्री डॉ. पंकज भोयर यांनीही घटनेची गंभीर दखल घेतली असून, “कोणत्याही परिस्थितीत कायदा हातात घेणाऱ्यांना सोडले जाणार नाही,” असा इशारा दिला आहे.
हजूर साहिबसारख्या अतिसंवेदनशील आणि ऐतिहासिक धार्मिक स्थळाजवळ घडलेल्या या घटनेमुळे सुरक्षा व्यवस्थेची कार्यक्षमता, व्हीआयपी संरक्षण आणि धार्मिक स्थळांवरील बंदोबस्त याबाबत नव्याने चर्चा सुरू झाली आहे. आता पोलिसांच्या तपासातून हल्ल्यामागील नेमके कारण समोर येते का, याकडे सर्वांचे लक्ष लागले आहे.
