बारामतीच्या आभाळात पुन्हा थरार! शिकाऊ विमान कोसळलं; आठ महिन्यांत तिसरी दुर्घटना, सुदैवाने जीवितहानी नाही
बारामती : पुणे जिल्ह्यातील बारामती विमानतळावर रविवारी दुपारच्या सुमारास पुन्हा एकदा विमान दुर्घटना घडल्याने परिसरात खळबळ उडाली. विमानतळ परिसरात शिकाऊ विमान अचानक कोसळल्याची माहिती समोर आली. सुदैवाने या दुर्घटनेत कोणतीही जीवितहानी झालेली नाही. मात्र, विमान कोसळण्यामागचं नेमकं कारण अद्याप स्पष्ट झालेलं नाही.
दुर्घटनेची माहिती मिळताच संबंधित यंत्रणांनी तातडीने घटनास्थळी धाव घेतली. विमानाची पाहणी आणि घटनास्थळावरील परिस्थितीचा आढावा घेण्याचं काम सुरू करण्यात आलं आहे. विमानामध्ये नेमके किती जण होते, पायलट किंवा अन्य व्यक्ती जखमी झाली आहे का, याबाबतची सविस्तर माहिती अद्याप समोर आलेली नाही. अपघाताच्या कारणांचा तपास संबंधित यंत्रणांकडून केला जात आहे.
विशेष म्हणजे, बारामती परिसरात गेल्या आठ महिन्यांत विमान दुर्घटनेची ही तिसरी घटना असल्याने विमानतळाच्या सुरक्षेचा मुद्दा पुन्हा चर्चेत आला आहे. यापूर्वी जानेवारी महिन्यात व्हीएसआर व्हेंचर्सचं लीयरजेट चार्टर विमान बारामती परिसरात कोसळलं होतं. या भीषण दुर्घटनेत तत्कालीन उपमुख्यमंत्री अजित पवार यांच्यासह पाच जणांचा मृत्यू झाला होता. या घटनेनंतर बारामतीतील विमान वाहतूक आणि सुरक्षेवर प्रश्न उपस्थित झाले होते.
यानंतर मे महिन्यात बारामतीच्या गोजुबावी गावाच्या हद्दीत आणखी एका शिकाऊ विमानाचा अपघात झाला होता. आपत्कालीन लँडिंग करत असताना हे विमान शेतात कोसळलं होतं. त्या घटनेत सुदैवाने कोणतीही जीवितहानी झाली नव्हती. आता पुन्हा बारामती विमानतळावर शिकाऊ विमान दुर्घटनाग्रस्त झाल्याने सलग घटनांमुळे चिंता वाढली आहे.
दरम्यान, रविवारी झालेल्या या अपघातानंतर विमान नेमकं कोणत्या परिस्थितीत कोसळलं, तांत्रिक बिघाड झाला होता का किंवा अन्य कोणतं कारण होतं, याचा तपास सुरू आहे. घटनास्थळावरील पुरावे आणि उपलब्ध माहितीतून दुर्घटनेचा नेमका घटनाक्रम समोर येण्याची शक्यता आहे.
या दुर्घटनेत जीवितहानी न झाल्याने मोठा अनर्थ टळला असला तरी बारामती परिसरात वारंवार घडणाऱ्या विमान अपघातांमुळे विमानतळाच्या सुरक्षेचा प्रश्न पुन्हा ऐरणीवर आला आहे. तपास पूर्ण झाल्यानंतरच या दुर्घटनेमागील नेमकं कारण स्पष्ट होणार आहे.
