ऑपरेशन टायगरनंतर आता ‘ऑपरेशन तुतारी’? शरद पवार गटाच्या खासदाराच्या फडणवीस भेटीने वाढल्या राजकीय अटकळी
मुंबई : शिवसेना (उद्धव बाळासाहेब ठाकरे) पक्षातील सहा खासदारांनी मुख्यमंत्री एकनाथ शिंदे यांच्या उपस्थितीत शिवसेनेत प्रवेश केल्यानंतर राज्यातील राजकारणाला वेग आला आहे. या घडामोडीनंतर आता ‘ऑपरेशन तुतारी’ची चर्चा रंगू लागली असतानाच राष्ट्रवादी काँग्रेस (शरद पवार) पक्षाचे आमदार रोहित पवार यांनी यावर पहिली प्रतिक्रिया दिली आहे.
बीडचे खासदार बजरंग सोनवणे यांनी मुख्यमंत्री देवेंद्र फडणवीस यांची भेट घेतल्यानंतर त्यांच्या पक्षांतराच्या चर्चांना उधाण आले होते. मात्र, या चर्चांना रोहित पवार यांनी पूर्णविराम देण्याचा प्रयत्न केला आहे.
रोहित पवार म्हणाले, “आमच्या पक्षाचा आणि समाजवादी पक्षाचा एकही खासदार फुटणार नाही. खासदारांना लक्ष्य करण्याचा प्रयत्न होईल, मात्र त्याचा काहीही परिणाम होणार नाही. भाजपला भविष्यातील राजकीय समीकरणांसाठी आणखी 41 खासदारांची गरज असू शकते, पण आमच्या पक्षातील कोणताही खासदार पक्ष सोडणार नाही.”
बजरंग सोनवणे यांच्या मुख्यमंत्री देवेंद्र फडणवीस यांच्यासोबतच्या भेटीबाबत बोलताना त्यांनी सांगितले की, “त्यांच्या मुलावर होत असलेल्या आरोपांच्या पार्श्वभूमीवर त्यांनी गृहमंत्री म्हणून मुख्यमंत्र्यांची भेट घेतली असावी. त्याचा पक्षांतराशी संबंध जोडणे योग्य नाही.”
सध्या शेतकरी कर्जमाफीच्या प्रश्नावर जनजागृती करण्यासाठी बीड जिल्ह्याच्या दौऱ्यावर असलेल्या रोहित पवार यांनी माध्यमांशी संवाद साधताना राज्यात ‘ऑपरेशन तुतारी’ होणार नसल्याचा ठाम दावा केला.
दरम्यान, शरद पवार गटाकडे सध्या आठ लोकसभा आणि एक राज्यसभा असे एकूण नऊ खासदार आहेत. त्यामुळे आगामी काळात राज्यातील राजकीय घडामोडींवर सर्वांचे लक्ष लागले आहे.
