सराफा बाजारात मोठी उलथापालथ; सोने-चांदीचे भाव घसरले, आजचे दर तपासा..
पुणे : आंतरराष्ट्रीय बाजारातील घडामोडींमुळे भारतीय सराफा बाजारात सोन्या-चांदीच्या दरात मोठी घसरण झाली आहे. अमेरिका-इराण तणाव, जागतिक आर्थिक अनिश्चितता आणि गुंतवणूकदारांचा बदलता कल यामुळे मौल्यवान धातूंवर दबाव वाढला असून 29 मे रोजी सोन्या-चांदीचे भाव लक्षणीयरीत्या खाली आले आहेत.
देशातील प्रमुख शहरांमध्ये 24 कॅरेट सोन्याच्या दरात घसरण नोंदवण्यात आली आहे. नवी दिल्लीत 10 ग्रॅम सोन्याचा भाव 1.56 लाख रुपयांच्या आसपास पोहोचला असून मुंबईतही सोन्याचे दर घसरले आहेत. जागतिक बाजारातील अस्थिरतेमुळे गुंतवणूकदारांनी सुरक्षित पर्याय म्हणून अमेरिकन डॉलरकडे मोर्चा वळवल्याने सोन्यावरील दबाव वाढल्याचे तज्ज्ञांचे मत आहे.
दरम्यान, अमेरिका आणि इराण यांच्यातील तणाव कमी करण्यासाठी सुरू असलेल्या चर्चांकडे जगाचे लक्ष लागले आहे. संभाव्य कराराबाबत विविध दावे-प्रतिदावे सुरू असतानाच ऊर्जा बाजार आणि जागतिक व्यापारावर त्याचा परिणाम होण्याची शक्यता व्यक्त केली जात आहे. त्यामुळे गुंतवणूकदार सध्या सावध भूमिका घेत असल्याचे दिसून येत आहे.
सोन्यासोबतच चांदीच्या दरातही मोठी घसरण झाली आहे. भारतीय बाजारात चांदीचा भाव प्रति किलो 2.74 लाख रुपयांच्या आसपास आला असून आंतरराष्ट्रीय बाजारातही चांदीवर दबाव कायम आहे. विशेष म्हणजे, याच वर्षाच्या सुरुवातीला चांदीने विक्रमी उच्चांक गाठला होता. मात्र, बदलत्या जागतिक परिस्थितीमुळे आता दरात लक्षणीय घसरण झाली आहे.
तज्ज्ञांच्या मते, आगामी काळात अमेरिका-इराण संबंध, डॉलरची स्थिती आणि जागतिक आर्थिक घडामोडींवर सोन्या-चांदीच्या किमतींची दिशा अवलंबून राहणार आहे.
