पिंपरी चिंचवडमध्ये अजित पवारांचा भाजपला धक्का ; माजी नगरसेवकाचा पक्षप्रवेश

पुणे : नगरपरिषद आणि नगरपालिकांच्या निवडणुकानंतर राज्यात महापालिका निवडणुकांची रणधुमाळी सुरू झाली आहे.अशातच उपमुख्यमंत्री अजित पवार यांनी भाजपला पिंपरी चिंचवड मध्ये मोठा धक्का दिला आहे.पिंपरी – चिंचवडमधील भाजपाचे माजी नगरसेवक संदीप वाघीरे यांनी अजित पवार यांच्या राष्ट्रवादीत प्रवेश केला आहे. त्यामुळे महापालिकेच्या तोंडावर भाजपला धक्का बसला आहे.

संदीप वाघेरे कोण आहेत?

संदीप बाळकृष्ण वाघिरे हे 2017 साली पिंपरी चिंचवड महानगरपालिकेत भाजपच्या उमेदवारीवर निवडून आले होते. ते पेशाने बांधकाम व्यावसायिक आहेत. त्यांचे राजकीय विरोधक शिवसेना उद्धव बाळासाहेब ठाकरे पक्षाचे शहराध्यक्ष संजोग वाघेरे यांनी दोन दिवसांपूर्वी भाजपमध्ये प्रवेश केला होता.वाघेरे हें लोकसभेला ठाकरेंच्या शिवसेनेकडून उभे होते. त्यावेळी संदीप वाघेरे यांनी शिवसेना शिंदे गटाचे श्रीरंग बारणे यांचा प्रचार करत त्यांना पिंपरी गावातून मोठे मताधिक्य दिले होते. त्यामुळे संजोग वाघेरे आणि संदीप वाघेरे हे राजकीय विरोधक आहेत. त्यातच संजोग वाघेरे यांनी भाजपमध्ये प्रवेश केल्यानंतर संदीप वाघेरे नाराज होऊन आज त्यांनी राष्ट्रवादी काँग्रेस अजित पवारांच्या पक्षात प्रवेश केला आहे.

दरम्यान या पक्षप्रवेश सोहळ्यासाठी अजित पवार स्वत: उपस्थित होते. हा पक्षप्रवेश म्हणजे पिंपरी चिंचवडमध्ये अजित पवारांचा भाजपावर पलटवारच असल्याचे बोलले जात आहे. काही दिवसांपूर्वी ठाकरेंच्या शिवसेना पक्षाचे संजोग वाघेरे यांनी भाजपात प्रवेश केला होता. संजोग वाघेरे हे भाजपात आल्याने संदीप वाघेरे नाराज होते. त्यामुळेच आता संदीप वाघेरे यांनी भाजपाला सोडचिठ्ठी देत अजित पवारांच्या राष्ट्रवादीत प्रवेश केला आहे.