उपसरपंच मृत्यू प्रकरणात नवा ट्विस्ट, नर्तिका पूजा गायकवाडच्या अडचणीत वाढ, नेमकं काय घडलं?
बीड : बीड जिल्ह्यातील लुखामसला गावचे माजी उपसरपंच गोविंद जगन्नाथ बर्गे यांनी काही दिवसांपूर्वी सोलापूर जिल्ह्यातील बार्शी तालुक्यात आत्महत्या केली होती. त्यांनी नर्तिका पूजा गायकवाडच्या घराबाहेर कारमध्ये स्वत:वर गोळी झाडून घेतली होती.
या आत्महत्या प्रकरणात अटकेत असलेल्या नर्तिका पूजा गायकवाड हिच्या अडचणीत वाढ झाली आहे. सोलापूर जिल्ह्यातील बार्शी येथे घडलेल्या या धक्कादायक घटनेत, सध्या तुरुंगात असलेल्या पूजाचा जामीन अर्ज न्यायालयाने नामंजूर केला आहे, ज्यामुळे तिचा तुरुंगातील मुक्काम वाढला आहे.
बीड जिल्ह्यातील लुखामसला गावचे माजी उपसरपंच गोविंद जगन्नाथ बर्गे यांनी काही दिवसांपूर्वी बार्शी येथे स्वत:वर गोळी झाडून जीवन संपवले होते. नर्तिका पूजा गायकवाड हिच्या घरासमोरच कारमध्ये त्यांनी हे टोकाचे पाऊल उचलले.
या आत्महत्येमागे पूजाचा मोठा हात असल्याचा आरोप आहे. बर्गे यांनी आत्महत्या करण्यापूर्वी पूजावर गंभीर आरोप केले होते. तिने सुरुवातीला प्रेमाच्या जाळ्यात ओढले आणि नंतर अत्याचाराचा खोटा गुन्हा दाखल करण्याची धमकी दिली.
इतकेच नाही, तर तिने बर्गे यांचा बंगला आणि पाच एकर जमीन स्वतःच्या नावावर करण्यासाठी सातत्याने मानसिक दबाव आणला होता. याच छळवणुकीला कंटाळून गोविंद बर्गे यांनी आत्महत्या केल्याचे समोर आले आहे.
दरम्यान, या प्रकरणातील आरोपी नर्तिका पूजा गायकवाडला जामीन मिळू नये, यासाठी जिल्हा सरकारी वकील डॉ. प्रदीपसिंग राजपूत यांनी न्यायालयात जोरदार युक्तिवाद केला. त्यांनी युक्तिवाद करताना स्पष्ट केले की, जर आरोपी पूजा गायकवाड हिला जामीन मंजूर केला, तर समाजात एक अत्यंत चुकीचा संदेश जाईल. एवढेच नाही, तर अशा महिलांकडून इतर पुरुषांची आर्थिक, मानसिक आणि शारीरिक छळवणूक होण्याची शक्यता नाकारता येणार नाही.
