सुनेत्रा पवारांच्या अडचणी वाढणार? मुंढवा जमीन प्रकरणात जवळचे सहकारी अडकले; आर्थिक गुन्हे शाखेची धडाधड कारवाई
पुणे : पुण्यातील बहुचर्चित मुंढवा जमीन प्रकरणात नवा ट्विस्ट समोर आला आहे. या प्रकरणाच्या तपासादरम्यान उपमुख्यमंत्री सुनेत्रा पवार यांचे दोन सहकारी आर्थिक गुन्हे शाखेच्या रडारवर आल्याची माहिती सूत्रांच्या हवाल्याने समोर आली आहे. या दोघांना नोटिसा बजावण्यात आल्याचा दावा केला जात असून, त्यांच्या उत्तरांकडे लक्ष लागले आहे.
सुनेत्रा पवारांच्या दोन सहकाऱ्यांना नोटिसा?
मिळालेल्या माहितीनुसार, संबंधित दोन्ही अधिकारी सध्या उपमुख्यमंत्री सुनेत्रा पवार यांचे विशेष कार्य अधिकारी म्हणून काम पाहतात. यापूर्वी ते अजित पवार यांच्याकडे स्वीय सहाय्यक म्हणून कार्यरत होते. पवार कुटुंबाच्या वैयक्तिक तसेच राजकीय कामांमध्येही त्यांचा सहभाग असल्याचे सांगितले जाते.
मुंढवा जमीन प्रकरणात या अधिकाऱ्यांची भूमिका तपासली जाण्याची शक्यता आहे. मात्र, त्यांच्यावरील आरोप अद्याप सिद्ध झालेले नाहीत.
पार्थ पवारांच्या कंपनीशी संबंधित प्रकरण
पुण्यातील मुंढवा परिसरातील सुमारे ४० एकर शासकीय जमिनीच्या व्यवहारावरून हे प्रकरण चर्चेत आले होते. हा व्यवहार पार्थ पवार यांच्याशी संबंधित ‘अमेडिया एंटरप्रायझेस एलएलपी’ कंपनीशी जोडला गेला आहे.
या व्यवहाराशी संबंधित पुराव्यांमध्ये छेडछाड झाली का आणि संबंधित अधिकाऱ्यांची त्यात काही भूमिका होती का, याबाबत आर्थिक गुन्हे शाखेला संशय असल्याचे सूत्रांचे म्हणणे आहे. या अनुषंगाने दोन्ही अधिकाऱ्यांची चौकशी होण्याची शक्यता व्यक्त केली जात आहे.
व्हॉट्सॲप चॅटचीही तपासणी होणार?
सामाजिक कार्यकर्त्या अंजली दमानिया आणि विजय कुंभार यांनी यापूर्वी या प्रकरणात संबंधित अधिकाऱ्यांनी पार्थ पवारांना मदत केल्याचा आरोप केला होता. प्रशासकीय पातळीवर मध्यस्थी करण्यात आल्याचाही दावा करण्यात आला होता.
या प्रकरणाशी संबंधित व्यक्ती आणि अधिकाऱ्यांमधील कथित व्हॉट्सॲप संभाषणांची तपासणी केली जाणार असल्याची माहिती सूत्रांनी दिली आहे. या संभाषणांतून व्यवहारासंदर्भात काही महत्त्वाचे धागेदोरे मिळतात का, हे तपासात स्पष्ट होऊ शकते.
दरम्यान, या प्रकरणात नोटिसा बजावण्यात आल्याची माहिती आणि संबंधित अधिकाऱ्यांची नेमकी भूमिका याबाबत अधिकृत तपशील समोर येणे बाकी आहे. तपासातूनच या प्रकरणातील आरोपांची सत्यता स्पष्ट होणार आहे.
