117 बेरोजगारांच्या स्वप्नांचा चक्काचूर! मंत्रालयाच्या नावाने बनावट भरती रॅकेटचा बारामतीत पर्दाफाश, 3.73 कोटींची महाफसवणूक
बारामती : सरकारी नोकरी मिळवण्याचे स्वप्न दाखवत शेकडो सुशिक्षित तरुण-तरुणींना गंडा घालणाऱ्या एका धक्कादायक आंतरराज्यीय रॅकेटचा बारामतीत पर्दाफाश झाला आहे. मंत्रालयातील वरिष्ठ अधिकाऱ्यांशी थेट संपर्क असल्याचा बनाव करून आरोपींनी 117 उमेदवारांकडून तब्बल 3 कोटी 73 लाख रुपये उकळल्याचा आरोप असून, या प्रकरणामुळे पुणे जिल्ह्यासह राज्यभरात खळबळ उडाली आहे.
प्राथमिक तपासानुसार, ही टोळी 2022 पासून सक्रिय होती. आरोग्य, वन, जलसंपदा, समाजकल्याण विभाग तसेच भारतीय रेल्वेसारख्या विविध सरकारी खात्यांमध्ये कायमस्वरूपी नोकरी मिळवून देण्याचे आश्वासन देत उमेदवारांचा विश्वास संपादन करण्यात आला. पदानुसार प्रत्येक उमेदवाराकडून 5 ते 6 लाख रुपये ऑनलाइन आणि रोख स्वरूपात घेतल्याची माहिती समोर आली आहे.
फसवणूक उघड होऊ नये म्हणून आरोपींनी अत्यंत नियोजनबद्ध पद्धतीने संपूर्ण बनावट भरती प्रक्रिया उभी केली होती. मंत्रालयाच्या नावाचे बनावट शिक्के, अधिकृत वाटाव्यात अशा निवड याद्या आणि नियुक्तीपत्रे तयार करून ती उमेदवारांच्या हाती देण्यात आली. एवढेच नव्हे तर 2023-24 च्या भरती प्रक्रियेचा संदर्भ देत उमेदवारांची मूळ कागदपत्रे आणि अर्जही जमा करून घेण्यात आले. त्यामुळे नियुक्ती मिळाल्याचा विश्वास अनेकांना अखेरपर्यंत वाटत राहिला.
दरम्यान, प्रत्यक्ष रुजू होण्याची वेळ आल्यानंतर संशय निर्माण झाला आणि संपूर्ण प्रकार उघडकीस आला. त्यानंतर पीडित रणजित मोटे यांनी बारामती तालुका पोलीस ठाण्यात तक्रार दाखल केली. या तक्रारीच्या आधारे पोलिसांनी शुभ्रायू सरकार उर्फ रुणा (मूळ पश्चिम बंगाल, सध्या दिल्ली) आणि प्रमोद गुरव (घणसोली, नवी मुंबई) यांच्याविरोधात फसवणुकीसह विविध कलमांन्वये गुन्हा दाखल केला आहे.
तपासादरम्यान या रॅकेटचे धागेदोरे दिल्लीसह इतर राज्यांपर्यंत पोहोचण्याची शक्यता व्यक्त केली जात आहे. बनावट कागदपत्रे तयार करण्यामागे आणखी कोणाचा सहभाग आहे, आर्थिक व्यवहार कुठे झाले आणि या जाळ्यात इतर किती जण अडकले आहेत, याचा तपास पोलीस करत आहेत.
सरकारी भरतीच्या नावाखाली फसवणुकीच्या घटना वाढत असल्याच्या पार्श्वभूमीवर पोलिसांनी उमेदवारांना केवळ अधिकृत सरकारी संकेतस्थळांवरील भरती प्रक्रियेवर विश्वास ठेवण्याचे आणि कोणत्याही व्यक्तीच्या आश्वासनावर मोठी रक्कम देण्यापूर्वी खातरजमा करण्याचे आवाहन केले आहे. बारामतीतील ही कारवाई राज्यभरातील बेरोजगार तरुणांसाठी मोठा इशारा मानली जात आहे.
