तारुण्याला झळाळी देणारी घागरा-चोळी ! घागरा -चोळीची फॅशन जाणून घ्या…!
उरुळी कांचन : भारतात घागरा-चोळीची प्रथा खूप जुनी आहे. गुजरात, राजस्थान, उत्तर प्रदेश ते आंध्र-कर्नाटकपर्यंतच्या प्रत्येक भागातील किशोरींची आवड घागरा-चोळीच आहे. महाराष्ट्रातील परकर-पोलके हेही घागरा-चोळीचेच एक रूप आहे.
सुरुवातीला घागरे केवळ सुती काळा, लाल, पिवळा आणि हिरवा या कापडाचेच असत. त्याची चोळीही मोठी होती. सोबत एक मीटरची ओढणी असे. राजस्थानी शैलीचे, गुजरातचे पॅच वर्क केलेले, काचकामाचे बनारसी घागरे, सोन्याच्या तारेची कशिदाकारी केलेले निरनिराळे प्रकारचे घागरे आपल्या देशात पाहायला मिळतात.
ऐंशीच्या दशकानंतर तरुणींच्या साऱ्या परिधानांमध्ये घागरा-चोळीला सर्वोच्च स्थान मिळाले. त्यामुळे उच्च आणि मध्यम वर्गातील किशोरींना समोर ठेवून विविध फॅशन डिझायनर्सनी घागरा- चोळी बाजारात उपलब्ध केली.
या शतकाच्या आरंभी फक्त सिल्क फॅब्रिकमध्येच हे परिधान मिळत होते. त्यात सोन्याच्या तारेची कशिदाकारी केली जात असे. आता राजस्थानी घागऱ्याची फॅशन जास्त होत आहे.
काळा, लाल, पिवळा आणि हिरवा या रंगांचे मिश्रण असलेले हे घागरे खूपच आकर्षक व जाड होते. या संपूर्ण परिधानासाठी दहा ते बारा मीटर कापड वापरले जात होते. यानंतर पूर्ण कशिदाकारीचे जास्त पेर नसलेले घागरे मिळू लागले व ते तरुणींना खूपच भावले.
तरुणींची आवड लक्षात घेत डिझायनर्सनी हिरव्या, क्रीम, मरून आणि क्रीम, लाल व पिवळया इ. रंगातही घागरे सादर केले. याच काळात मोती-शिंपल्यांचे, बुझ्न बीड्सचे व झालरीचे घागरेही आले. आता तर सिल्व्हारिश ग्रे, रस्ट ब्राउन, मेंदी व सोनेरी रंग जास्त प्रचलित होत आहेत. आजकाल वधूसाठीही लाल रंगाऐवजी सोनेरी रंगाच्या घागऱ्याची फॅशन होत आहे.
