महाराष्ट्राच्या राजकारणातील सर्वात मोठी बातमी! आदित्य ठाकरे शिवसेनेचे कार्याध्यक्ष होणार? लवकरच होणार घोषणा..
मुंबई : युवासेनेचे प्रमुख आणि आमदार आदित्य ठाकरे यांच्या खांद्यावर लवकरच एका अत्यंत महत्त्वपूर्ण पदाची धुरा सोपवली जाणार असल्याची चर्चा राजकीय वर्तुळात रंगली आहे. ठाकरे गटाचे आमदार आणि युवासेनाप्रमुख आदित्य ठाकरे यांच्यावर लवकरच शिवसेनेकडून मोठी जबाबदारी दिली जाण्याची शक्यता आहे.
सूत्रांच्या माहितीनुसार, आदित्य ठाकरे यांच्याकडे शिवसेनेच्या कार्याध्यक्षपदाची धुरा दिली जाणार आहे. आदित्य ठाकरे यांना पक्षाकडून 19 जून रोजी पक्षाच्या वर्धापनदिनी जबाबदारी दिली जाण्याची शक्यता आहे. यामुळे शिवसेनेतील आदित्य ठाकरे यांचे महत्त्व वाढणार असून त्यांच्याकडे मोठ्याप्रमाणावर अधिकार येतील, असे सांगितले जात आहे.
दरम्यान, 2003 साली ज्या प्रकारे उद्धव ठाकरे यांना शिवसेना पक्षात कार्याध्यक्ष पदाची जबाबदारी देण्यात आली होती, अगदी तशाचप्रकारे आदित्य ठाकरे यांना कार्याध्यक्ष करून पक्षाची महत्वाची जबाबदारी देण्यात येईल, असे ठाकरे गटाच्या नेत्यांकडून सांगितले जात आहे. यासाठी शिवसेना पक्षाकडून कार्यकारिणी बैठक बोलवून तसा रितसर प्रस्ताव मांडून तो मंजूर केला जाऊ शकतो.
गेल्या काही वर्षांपासून आदित्य ठाकरे हे संघटनात्मक निर्णय ते निवडणुकांपर्यंत अनेक महत्त्वाच्या जबाबदाऱ्या पार पाडत आहेत. त्यामुळे आता त्यांना मोठी जबाबदारी दिली पाहिजे, असा एक मतप्रवाह शिवसेनेच्या काही नेत्यांमध्ये आहे. त्यामुळे पक्षाला नवी उभारी मिळू शकते.
आदित्य ठाकरे यांच्या नेतृत्त्वाखाली शिवसेनेत नवी फळी बांधली जाईल, असा एक मतप्रवाह आहे. त्यादृष्टीने शिवसेनेच्या ज्येष्ठ नेत्यांची चर्चा सुरु असून उद्धव ठाकरे यांच्याप्रमाणे आदित्य ठाकरे यांना शिवसेनेच्या कार्याध्यक्षपदी धुरा देऊन ते राजकारणात एक पाऊल आणखी पुढे जातील, असा प्रयत्न आहे. त्यासाठीचा प्रस्ताव लवकरच मंजूर होऊ शकतो, अशी सूत्रांची माहिती आहे.
