मोदींनंतर पंतप्रधान कोण? महाराष्ट्रातील दोन नेत्यांची नावं चर्चेत असल्याचा संजय राऊतांचा दावा
मुंबई : नरेंद्र मोदी यांच्यानंतर पंतप्रधानपदासाठी तीन नेत्यांची चर्चा आहे. त्यापैकी दोन नेते महाराष्ट्रातील, तर एक नेता मध्य प्रदेशातील असल्याचा दावा ठाकरे गटाचे खासदार संजय राऊत यांनी केला आहे.
हे तिन्ही नेते राष्ट्रीय स्वयंसेवक संघाच्या पसंतीचे असल्याचेही राऊत यांनी म्हटले आहे. संघाच्या या यादीत केंद्रीय गृहमंत्री अमित शाह यांचे नाव नसल्याचा दावा करत राऊत यांनी शाह यांच्यावर जोरदार निशाणा साधला.
“अमित शाह कितीही प्रयत्न करत असले तरी ते पंतप्रधान होणार नाहीत,” असा दावा संजय राऊत यांनी केला. संघाचा अजेंडा राबवण्याची आपलीच किती काळजी आहे, हे दाखवण्याचा प्रयत्न अमित शाह करत असल्याचेही ते म्हणाले.
समान नागरी कायद्यावरूनही शाहांवर टीका
समान नागरी कायदा लागू करण्याच्या प्रयत्नांबाबत बोलताना संजय राऊत यांनी अमित शाहांवर टीका केली. समान नागरी कायदा लागू करण्यासाठी काही ठिकाणी संविधानिक बदल करावे लागतील, असे ते म्हणाले.
“देशात एक संविधान, एक तिरंगा आणि एक कायदा असावा, याबाबत दुमत नाही. कोणीही त्याला विरोध केलेला नाही. मात्र, याचा वापर केवळ स्वार्थी राजकारणासाठी आणि निवडणुकांसाठी केला जात असेल, तर त्याला आमचा आक्षेप आहे,” अशी भूमिका राऊत यांनी मांडली.
‘अमित शाहांची पंतप्रधान होण्यासाठी धडपड सुरू’
अमित शाह यांना देशाचे पंतप्रधान होण्याची घाई झाली असल्याचा दावा संजय राऊत यांनी केला. त्यामुळेच ते वारंवार मुंबईत येत असल्याचेही ते म्हणाले.
“पंतप्रधानपदासाठी संघाच्या मनातील व्यक्ती वेगळी आहे. ती व्यक्ती अमित शाह नाही. संघाचा अजेंडा राबवण्यात मी किती निष्ठावान आहे, हे दाखवण्याचा प्रयत्न अमित शाह करत आहेत. संघाच्या मनातील दोन व्यक्ती महाराष्ट्रातील आहेत, तर एक व्यक्ती मध्य प्रदेशातील आहे. यात अमित शाह कुठेच नाहीत,” असा दावा राऊत यांनी केला.
तसेच, अमित शाह यांनी महाराष्ट्रातील मराठी माणसाचे नुकसान केले, मराठी माणसांची एकजूट तोडली आणि बाळासाहेब ठाकरे यांच्या संघटनेवर कुऱ्हाड चालवली, असा आरोपही राऊत यांनी केला.
‘अमित शाहांना जबरदस्त महत्त्वाकांक्षा’
अमित शाह यांना पंतप्रधान होण्याची मोठी महत्त्वाकांक्षा असल्याचा दावा करत राऊत यांनी राम मंदिराच्या मुद्द्यावरूनही त्यांच्यावर टीका केली.
“राम मंदिराचा अजेंडा अमित शाहांनी पूर्ण केलेला नाही. राम मंदिराच्या लढ्यात कारसेवक आणि शिवसेना होती. त्यावेळी अमित शाह आणि नरेंद्र मोदी कुठे होते? बाळासाहेब ठाकरे आणि आम्ही राम मंदिर आंदोलनात आरोपी होतो. राम मंदिरासाठी शिवसैनिक, कारसेवक आणि साधू-संतांनी बलिदान दिले,” असे राऊत म्हणाले.
या लढ्याचे श्रेय सत्तेवर असलेल्या लोकांनी घेऊ नये, असेही त्यांनी म्हटले.
‘पीओके ताब्यात घ्या, मग खरा मर्द समजू’
कलम 370 हटवण्यापेक्षा पाकिस्तानच्या ताब्यातील काश्मीर ताब्यात घेऊन अखंड हिंदुस्थान करण्याचे संघाचे उद्दिष्ट पूर्ण करा, असे आव्हानही संजय राऊत यांनी दिले.
“कलम 370 हटवणे सोपे होते. संसदेत बहुमत होते, विधेयक आणले आणि ते मंजूर केले. पाकिस्तानच्या ताब्यातील काश्मीर ताब्यात घेणे हा संघाचा मुख्य अजेंडा आहे. ते पूर्ण करा. ते केल्यास तुम्हाला खरा मर्द समजू,” असा टोला राऊत यांनी लगावला.
‘अमित शाह कधीच पंतप्रधान होणार नाहीत’
अमित शाह यांनी कोणतेही अभियान सुरू केले किंवा मोदींच्या सत्तेवर बसण्याचा सोहळा साजरा केला, तरी ते पंतप्रधान होणार नाहीत, असा दावा संजय राऊत यांनी केला.
“अमित शाह कधीच पंतप्रधान होणार नाहीत. मोदीच संधी मिळेल तेव्हा त्यांना दूर करतील,” असेही राऊत म्हणाले. त्यांच्या या विधानामुळे आगामी काळातील भाजपमधील नेतृत्वाच्या चर्चेला पुन्हा राजकीय रंग मिळण्याची शक्यता आहे.
