लाडक्या बहिणींच्या जीवाला घोर! केवायसी केल्याशिवाय हप्ता नाहीचं, सप्टेंबर – ऑक्टोंबरचा हफ्ता रखडणार?

पुणे : मुख्यमंत्री लाडकी बहीण योजनेबाबत आता महत्त्वाची माहिती समोर येत आहे. या योजनेतील बोगसगिरीला आळा बसवण्यासाठी सरकारने ई- केवायसी करणे योजनेत बंधनकारक केले आहे. नोव्हेंबरपूर्वी ई-केवायसीची प्रक्रिया पूर्ण करणे आवश्यक आहे. तर सप्टेंबर आणि ऑक्टोबरचा हप्ता ई-केवायसी नसल्याने थांबवण्यात येणार असल्याची चर्चा सुरू आहे. त्यामुळे लाडक्या बहिणीच्या जीवाला आता घोर लागला आहे.

सप्टेंबर-ऑक्टोबर हप्ता थांबणार?

लाडकी बहीण योजनेच्या सप्टेंबर आणि ऑक्टोबर महिन्याच्या हप्त्यासाठी ई-केवायसी करणे बंधनकारक असल्याचा कोणताही निर्णय सरकारने जाहीर केलेला नाही. पण दोन महिन्यात ई-केवायसी करणे आवश्यक आहे. त्यामुळे नोव्हेंबरचा हप्ता ई-केवायसी नसेल तर थांबू शकतो. नोव्हेंबरचा हप्ता आणि त्यापुढील हप्ते हे ई-केवायसी अभावी थांबवले जाऊ शकतात,अशी शक्यता वर्तवली जात आहे.

लाडक्या बहिणींना ई-केवायसी करताना पोर्टलमध्ये अनेक तांत्रिक अडचणी येत आहे. अपलोड आणि इतर प्रक्रिया करताना लाडक्या बहिणींना अडचणींचा सामना करावा लागत आहे. त्यामुळे लाडक्या बहिणींना ई-केवायसी करता आलेली नाही. पण ई-केवायसी केली नाही तर पुढील हप्ते थांबविण्यात येऊ शकतात. ही प्रक्रिया पूर्ण करण्यासाठी अजून दीड महिन्यांचा कालावधी आहे. त्यामुळे या काळात ई-केवायसीची प्रक्रिया पूर्ण करता येईल.

अशी करा ई-केवायसी प्रक्रिया पूर्ण

लाभार्थी महिलांनी मोबाईल अथवा संगणकावर ladkibahin.maharashtra.gov.in या पोर्टलला भेट द्या

लॉगिन केल्यावर ईकेवायसी प्रक्रिया पूर्ण करण्याविषयीचा पर्याय दिसेल. त्यावर क्लिक करा

तुमचा आधार क्रमांक नोंदवा

आता कॅप्चा कोड तिथे नोंदवा

आधार प्रमाणिकरणासाठी मंजूरी द्या. Send OTP या पर्यायावर क्लिक करा

आधारशी लिंक मोबाईल क्रमांकावर OTP नमूद का. Submit करा

आता ही प्रक्रिया पूर्ण करणे गरजेचे

नवीन नियमानुसार पती, वडिलांचा आधार कार्ड क्रमांक, कॅप्चा कोड आणि OTP नमुद करा

आता लाभार्थी लाडक्या बहिणीचा जात प्रवर्ग निवडा

आवश्यक प्रमाणित घोषणापत्रावर क्लिक करा

आता संपूर्ण माहिती एकदा वाचा. सबमिट बटन क्लिक करा.

e-KYC पडताळणी यशस्वीरित्या पूर्ण झाल्याचा संदेश स्क्रीनवर दिसेल.