धक्कादायक! होळी खेळताना फुगा लागला म्हणून अल्पवयीन मुलावर हल्ला, घटनेने उडाली खळबळ..
डोबिंवली : डोंबिवली पूर्वेतील मानपाडा रस्त्यावरील सागाव येथील यशवंत कॉम्पलेक्स भागात गुरुवारी रात्री साडे वाजता सोसायटी आणि परिसरातील मुले होळीनिमित्त रंगाचे फुगे एकमेकांवर फेकून होळीचा आनंद घेत होती. याच पार्श्वभूमीवर एक धक्कादायक घटना समोर आली आहे.
रंगाचे फुगे एकमेकांवर फेकले जात असताना एक फुगा तेथेच उभ्या असलेल्या तरूणाच्या अंगावर पडला. त्यामुळे संतप्त झालेल्या एका तरूणाने फुगा फेकणाऱ्या अल्पवयीन तरूणाला जाब विचारत मारहाण तर केलीच, शिवाय अंधारात नेऊन त्याच्यावर धारदार हत्याराने हल्ला केला.
या हल्ल्यात हर्ष शिवाजी कांबळे (वय. १७) हा जखमी झाला असून त्याच्या जबानीवरून मानपाडा पोलिसांनी हल्लेखोर प्रणय जाधव (रा. यशवंत कॉम्प्लेक्स, सांगाव) याच्या विरोधात गुन्हा दाखल केला आहे.
हर्ष कांबळे हा मानपाडा रोडला असलेल्या शंकेश्वर शाळेजवळील साई विधी सोसायटीत कुटुंबासह राहतो. तर हल्लेखोर प्रणय जाधव हा तेथेच असलेल्या यशवंत काॅम्पलेक्समध्ये राहतो.
मिळालेल्या माहिती नुसार, गुरूवारी रात्री साडेआठच्या सुमारास यशवंत काॅम्पलेक्स परिसरात होळी पौर्णिमेनिमित्त हर्ष आणि त्याचे मित्र रंगाचे फुगे एकमेकांवर फेकून होळीचा आनंद घेत मौजमज्जा करत होते. त्यावेळी यशवंत काॅम्पलेक्समधील प्रणय हा मौजमजेत सहभागी न होता तो दूरवर उभा होता.
रंगाचे फुगे एकमेकांंवर फेकत असतानाच त्यातील एक फुगा हर्षकडून चुकून प्रणयच्या अंगावर जाऊन पडला. त्यामुळे प्रणय भडकला. तू माझ्यावर रंगाचा फुगा का फेकला, असा जाब विचारत प्रणय याने हर्षला शिवीगाळ करत ठोसा-बुक्क्याने मारहाण केली.
त्यानंतर टी-शर्ट पकडून त्याला शंकेश्वर शाळेजवळील अंधार असलेल्या कोपऱ्यात जबरदस्तीने खेचत नेले. तेथे हर्षच्या हाताच्या दंडावर धारदार हत्याराने वार केले. हर्ष जखमी झाल्याचे पाहताच हल्लेखोर प्रणय जाधव याने तेथून पळ काढला.
दरम्यान, या घटनेनंतर परिसरात काही काळ तणावाचे वातावरण निर्माण झाले होते. जखमी अवस्थेत हर्षला उपचारासाठी रूग्णालयात दाखल करण्यात आले. त्याच्या डाव्या हाताच्या दंडाला मोठी जखम झाली आहे.
