डॉक्टरांना मारहाण प्रकरणात मोठा ट्विस्ट! शिवसेना नगरसेवक रमेश म्हात्रेला जामीन; न्यायालयाच्या निर्णयाने रंगली नवी चर्चा
डोंबिवली : डोंबिवलीतील शासकीय रुग्णालयात डॉक्टर आणि आरोग्य कर्मचाऱ्यांना मारहाण केल्याच्या गाजलेल्या प्रकरणात शिवसेना (शिंदे गट) नगरसेवक रमेश म्हात्रे यांना मोठा दिलासा मिळाला आहे. कल्याण न्यायालयाने त्यांना 50 हजार रुपयांच्या जातमुचलक्यावर जामीन मंजूर केला. मात्र, या प्रकरणातील इतर आरोपी अद्याप न्यायालयीन प्रक्रियेत असून त्यांच्या जामिनाबाबत पुढील सुनावणीत निर्णय होणार आहे.
काही दिवसांपूर्वी डोंबिवलीतील शास्त्रीनगर येथील शासकीय रुग्णालयात डॉक्टर, महिला डॉक्टर, नर्स आणि कर्मचाऱ्यांशी झालेल्या वादानंतर मारहाणीची घटना घडली होती. या घटनेचा व्हिडीओ सोशल मीडियावर व्हायरल झाल्यानंतर राज्यभरातून संताप व्यक्त करण्यात आला. डॉक्टर संघटना, वैद्यकीय क्षेत्रातील विविध संघटना तसेच विरोधी पक्षांनी आरोपींवर कठोर कारवाईची मागणी केली होती.
या प्रकरणी विष्णुनगर पोलिसांनी नगरसेवक रमेश म्हात्रे यांच्यासह चार जणांना अटक केली होती. सुरुवातीला तिघांना ताब्यात घेण्यात आले होते. मात्र, व्हिडीओ समोर आल्यानंतर वाढलेल्या जनक्षोभामुळे रमेश म्हात्रे यांनाही अटक करण्यात आली. त्यानंतर न्यायालयाने सर्व आरोपींना न्यायालयीन कोठडी सुनावली होती.
दरम्यान, रमेश म्हात्रे यांची प्रकृती ठीक नसल्याचे सांगत पोलिसांनी त्यांना व्हिडीओ कॉन्फरन्सिंगद्वारे न्यायालयासमोर हजर करण्याची विनंती केली होती. मात्र, कल्याण न्यायालयाने हा अर्ज फेटाळून लावत आरोपीला प्रत्यक्ष न्यायालयात हजर करण्याचे आदेश दिले. त्यानंतर त्यांना न्यायालयात आणण्यात आले आणि पुढील सुनावणी पार पडली.
जामीन अर्जावरील सुनावणीदरम्यान दोन्ही बाजूंकडून जोरदार युक्तिवाद करण्यात आला. आरोपींच्या वकिलांनी रमेश म्हात्रे यांच्या प्रकृतीचा मुद्दा मांडत, त्यांना एकच किडनी असून वैद्यकीय उपचारांची आवश्यकता असल्याचे न्यायालयाच्या निदर्शनास आणून दिले. तसेच संबंधित प्रकरणातील तपासासाठी आवश्यक सहकार्य करण्याची तयारीही दर्शवली.
याउलट सरकारी पक्षाने आरोपीला जामीन दिल्यास फिर्यादी आणि साक्षीदारांवर दबाव आणला जाऊ शकतो, तसेच तपासावर परिणाम होण्याची शक्यता असल्याचा युक्तिवाद केला. दोन्ही बाजूंचा युक्तिवाद ऐकल्यानंतर न्यायालयाने रमेश म्हात्रे यांना 50 हजार रुपयांच्या जातमुचलक्यावर सशर्त जामीन मंजूर केला.
या प्रकरणामुळे रमेश म्हात्रे यांचा जुना गुन्हेगारी इतिहासही पुन्हा चर्चेत आला आहे. त्यांच्यावर यापूर्वी हत्येचा प्रयत्न, अपहरणासारखे गंभीर गुन्हे दाखल असल्याचे समोर आले आहे. 2008 मध्ये त्यांच्यावर जीवघेणा गोळीबार झाला होता. त्या वेळी एका खासगी रुग्णालयातील डॉक्टरांनी शस्त्रक्रिया करून त्यांचे प्राण वाचवले होते. त्याआधीच्या हल्ल्यात त्यांची एक किडनी निकामी झाल्यानंतरही त्यांच्यावर उपचार करण्यात आले होते. अशा पार्श्वभूमीवर डॉक्टरांवर झालेल्या कथित हल्ल्यामुळे या प्रकरणाला अधिक संवेदनशील स्वरूप प्राप्त झाले आहे.
सध्या या गुन्ह्याचा तपास विष्णुनगर पोलीस करत असून, सीसीटीव्ही फुटेज, व्हायरल व्हिडीओ आणि प्रत्यक्षदर्शींचे जबाब तपासाचा महत्त्वाचा भाग आहेत. जामीन मिळाला असला तरी न्यायालयीन प्रक्रिया सुरूच राहणार असून पुढील सुनावणीमध्ये इतर आरोपींच्या जामीन अर्जांवर निर्णय होण्याची शक्यता आहे. डॉक्टरांवरील हल्ल्याच्या या प्रकरणाकडे राज्यभरातील वैद्यकीय क्षेत्रासह राजकीय वर्तुळाचेही लक्ष लागले आहे.
