Shirur : शिरुर येथील आनंद पतसंस्थेत कोट्यवधीचा घोटाळा, अध्यक्षासह १४ जणांवर गुन्हा…
Shirur : शिरुर येथील आनंद नागरी पतसंस्थेच्या चेअरमन, व्यवस्थापक व इतरांनी तब्बल १६ कोटी ७० लाख ५४ हजार ३६१ रुपयांचा अपहार करुन ठेवीदारांची फसवणूक केल्याचा प्रकार समोर आला आहे.
याप्रकरणी पतसंस्थेचे चेअरमन अभयकुमार चोरडिया यांच्यासह व्यवस्थापक व अन्य १४ जणांवर शिरुर पोलीस ठाण्यात गुन्हा दाखल करण्यात आला आहे. या प्रकरणी शासकीय अधिकाऱ्याने फिर्याद दिली आहे.
सविस्तर माहिती अशी की, ३१ डिसेंबर २०१३ ते दि. २० फेब्रुवारी २०२० या कालावधीमध्ये शिरुर येथील आनंद नागरी सहकारी पतसंस्था मर्यादित या संस्थेमध्ये अध्यक्ष अभयकुमार पोपटलाल चोरडिया आणि इतर त्यांचे साथीदार प्रविण चंपालाल चोरडीया , मुरसलीन वहिंद मोहमद, सनी धरमचंद चोरडीया, सविता अभयकुमार चोरडिया, सुजाता नितीन चोरडिया, प्रितम प्रवीण चोरडिया , पारसबाई पोपटलाल चोरडीया, चंपालाल बुधमल चोरडिया, सुरेंद्रकुमार रतनलाल चोरडिया, संस्था व्यवस्थापक शांताराम गंगाधर देवकर या व्यक्तींनी चाचणी लेखापरीक्षणानुसार संस्था कामकाजात निदर्शनास आलेल्या गंभीर बाबी, अपहार, अफरातफर, अनियमितता करुन संस्था सभासदांचा व ठेवीदारांचा विश्वासघात व फसवणूक केली आहे.
दरम्यान, सरिता ब्रिजमोहन सिंह, सनदी लेखापाल, नागेंद्र एच. सोरटे, प्रामाणिक लेखापरीक्षक अजय एच. सोरटे, प्रामाणिक लेखापरीक्षक यांनी संगनमत करुन वरील कालावधीत स्वत:च्या फायद्यासाठी पतसंस्थेतील ठेवीदारांच्या ठेवींची रक्कम ही स्वत:चे फायद्यासाठी आपल्याच फर्मच्या नावे कर्ज वितरण करुन ठेवीदारांची १६ कोटी ७० लाख ५४ हजार ३६१ एवढ्या रक्कमेचा अपहार केला. आरोपींनी ठेवीदारांचा विश्वासघात केला. या गुन्ह्याचा अधिक तपास पोलीस उपनिरीक्षक मुजावर करीत आहेत.
